រដ្ឋមន្ត្រីការពារជាតិអ៊ីរ៉ង់ លោក Aziz Nasirzadeh បានព្រមានកាលពីថ្ងៃអាទិត្យ (០៤ ឧសភា) ថា ទីក្រុងតេអេរ៉ង់ នឹងវាយប្រហារតបវិញ ប្រសិនបើសហរដ្ឋអាមេរិក ឬអ៊ីស្រាអែល បើកការវាយប្រហារលើទឹកដីរបស់អ៊ីរ៉ង់។ ការអត្ថាធិប្បាយរបស់លោក Nasirzadeh បានធ្វើឡើងបន្ទាប់ពីនាយករដ្ឋមន្ត្រីអ៊ីស្រាអែល លោក Benjamin Netanyahu បានប្តេជ្ញាសងសឹកអ៊ីរ៉ង់ ខណៈក្រុមក្រុមហ៊ួទី ដែលអ៊ីរ៉ង់គាំទ្រ បានបាញ់មីស៊ីល ធ្លាក់នៅជិតអាកាសយានដ្ឋានសំខាន់របស់អ៊ីស្រាអែល។

លោក Nasirzadeh បានប្រាប់ទូរទស្សន៍រដ្ឋអ៊ីរ៉ង់ថា "ប្រសិនបើសង្រ្គាមនេះត្រូវបានផ្តួចផ្តើមដោយអាមេរិក ឬរបបជ្វីហ្វនិយម (អ៊ីស្រាអែល) នោះអ៊ីរ៉ង់នឹងកំណត់គោលដៅលើផលប្រយោជន៍ មូលដ្ឋាន និងកងកម្លាំងរបស់ពួកគេតបវិញ - នៅគ្រប់ទីកន្លែង និងគ្រប់ពេលទាំងអស់ ដែលចាត់ទុកថាចាំបាច់"។

គួរឱ្យដឹងថា ក្រុមហ៊ួទី គាំទ្រដោយអ៊ីរ៉ង់ របស់យេម៉ែន បានបាញ់មីស៊ីលកាលពីថ្ងៃអាទិត្យ ដែលបានធ្លាក់នៅជិតអាកាសយានដ្ឋាន Ben Gurion របស់អ៊ីស្រាអែល ដោយនិយាយថាពួកគេកំពុងធ្វើសកម្មភាពក្នុងសាមគ្គីភាពជាមួយប៉ាឡេស្ទីននៅតំបន់ហ្កាហ្សា។ ដោយជំរុញបន្ថែមពីលើជំហរផ្លូវការរបស់អ៊ីរ៉ង់ លោក Nasirzadeh បាននិយាយថា ក្រុមហ៊ួទីធ្វើសកម្មភាពដោយឯករាជ្យ ក្រោមហេតុផលផ្ទាល់ខ្លួនរបស់ពួកគេប៉ុណ្ណោះ។

លោក Nasirzadeh ក៏បាននិយាយថា អ៊ីរ៉ង់មិនមានអរិភាពចំពោះប្រទេសជិតខាងទេ ប៉ុន្តែក្នុងករណីមានការវាយប្រហារណាមួយកើតឡើង មូលដ្ឋានទ័ពអាមេរិកដែលមានទីតាំងនៅក្នុងតំបន់ នឹងត្រូវបានចាត់ទុកថាជាគោលដៅរបស់ទីក្រុងតេអេរ៉ង់។ សេចក្តីថ្លែងការណ៍របស់រដ្ឋមន្ត្រីរូបនេះ បានធ្វើឡើងបន្ទាប់ពីអ៊ីរ៉ង់ កាលពីថ្ងៃអាទិត្យ បានបើកបង្ហាញនូវមីស៊ីលបាលីស្ទិកឥន្ធនៈរឹងថ្មីមួយ ឈ្មោះថា "Qassem Bassir" ដែលមានរយៈចម្ងាយ ១.២០០ គីឡូម៉ែត្រ នេះបើតាមសេចក្ដីរាយការណ៍របស់ប្រព័ន្ធផ្សព្វផ្សាយរដ្ឋ៕