ប្រធានាធិបតីអាមេរិក លោក Donald Trump បានប្រកាសកាលពីថ្ងៃអាទិត្យ (០៤ ឧសភា) ពីការយកពន្ធ ១០០% លើភាពយន្តដែលផលិតនៅក្រៅសហរដ្ឋអាមេរិក ដោយនិយាយថា ឧស្សាហកម្មភាពយន្តអាមេរិក ហូលីវូដ កំពុង "ស្លាប់បាត់យ៉ាងលឿន" ដោយសារតែការលើកទឹកចិត្ត ដែលប្រទេសផ្សេងទៀតកំពុងផ្តល់ជូនដើម្បីទាក់ទាញអ្នកផលិតភាពយន្តអាមេរិក។

នៅក្នុងការបង្ហោះលើបណ្ដាញសង្គម Truth Social លោក Trump បាននិយាយថា "នេះគឺជាការខិតខំប្រឹងប្រែងរួមគ្នាដោយប្រជាជាតិដទៃទៀត ហើយដូច្នេះនេះជាការគំរាមកំហែងសន្តិសុខជាតិ រួមទាំងការផ្ញើសារ និងការឃោសនា"។

លោក Trump បាននិយាយថា លោកកំពុងផ្តល់សិទ្ធិឱ្យទីភ្នាក់ងាររដ្ឋាភិបាលសហរដ្ឋអាមេរិកដែលពាក់ព័ន្ធ ដូចជាក្រសួងពាណិជ្ជកម្ម ដើម្បីចាប់ផ្តើមភ្លាមៗនូវដំណើរការនៃការដាក់ពន្ធ ១០០% លើខ្សែភាពយន្តទាំងអស់ដែលផលិតនៅបរទេស ដែលបន្ទាប់មកត្រូវបានបញ្ជូនទៅសហរដ្ឋអាមេរិក។

រដ្ឋមន្រ្តីពាណិជ្ជកម្មអាមេរិក លោក Howard Lutnick បានបង្ហោះនៅលើបណ្ដាញសង្គម X ថា "ក្រុមការងារលោកកំពុងធ្វើការលើរឿងនោះ"។ ទាំងលោក Lutnick និងលោក Trump មិនបានផ្តល់ព័ត៌មានលម្អិតអំពីការអនុវត្តពន្ធនោះទេ។ ភ្លាមៗនេះ គេក៏មិនទាន់ដឹងច្បាស់ដែរថា តើវិធានការនោះនឹងកំណត់គោលដៅតែលើក្រុមហ៊ុនផលិតកម្មភាពយន្តបរទេស ឬក៏ដាក់ទាំងក្រុមហ៊ុនអាមេរិកដែលផលិតភាពយន្តនៅក្រៅប្រទេស៕