ការិយាល័យប្រព័ន្ធផ្សព្វផ្សាយរដ្ឋាភិបាលរបស់ដែនដីហ្កាហ្សា បាននិយាយថា កុមាររាប់ម៉ឺននាក់ "កំពុងប្រឈមមុខនឹងសេចក្ដីស្លាប់" រួមទាំងកុមារប្រហែល ៧០.០០០នាក់ កំពុងសម្រាកព្យាបាលនៅមន្ទីរពេទ្យក្នុងដែនដីប៉ាឡេស្ទីននេះ ដោយសារកង្វះអាហារូបត្ថម្ភធ្ងន់ធ្ងរ ស្របពេលជាងពីរខែនៃការបិទផ្លូវជំនួយទាំងស្រុងរបស់អ៊ីស្រាអែល។

សេចក្តីថ្លែងការណ៍របស់ការិយាល័យប្រព័ន្ធផ្សព្វផ្សាយហ្កាហ្សា នៅលើកម្មវិធីផ្ញើសារតេលេក្រាម បាននិយាយកាលពីថ្ងៃអាទិត្យ (០៤ ឧសភា) ថា "នៅក្រោមការទប់ស្កាត់ជាប្រព័ន្ធនេះ កុមារជាង ៣.៥០០នាក់ អាយុក្រោម ៥ឆ្នាំ ប្រឈមមុខនឹងការស្លាប់ដោយសារភាពអត់ឃ្លាន ខណៈកុមារប្រមាណ ២៩០.០០០នាក់ កំពុងស្ថិតលើមាត់ជ្រោះនៃសេចក្ដីស្លាប់" ។

ការិយាល័យនេះបន្ថែមថា "កុមារ ១,១លាននាក់ជារៀងរាល់ថ្ងៃ ខ្វះខាតតម្រូវការអាហារូបត្ថម្ភអប្បបរមាសម្រាប់ការរស់រានមានជីវិត ហើយឧក្រិដ្ឋកម្មនេះកំពុងត្រូវបានប្រព្រឹត្តដោយអ៊ីស្រាអែល ក្នុងការប្រើភាពអត់ឃ្លានជាអាវុធ ស្របពេលភាពស្ងៀមស្ងាត់អន្តរជាតិដ៏អាម៉ាស់"។

ជនជាតិប៉ាឡេស្ទីនយ៉ាងហោចណាស់ ៥៧នាក់ បានស្រេកឃ្លានដល់ស្លាប់ ដែលបង្កកំហឹងជាសកល ប៉ុន្តែពិភពលោកបានបរាជ័យក្នុងការបញ្ចុះបញ្ចូលអ៊ីស្រាអែល ឱ្យអនុញ្ញាតការចូលនៃជំនួយទៅក្នុងដែនដីដែលប្រជាជនចំនួន ២,៣លាននាក់នេះ។ យោងតាមទីភ្នាក់ងារជំនួយបានឱ្យដឹងថា កង្វះខាតស្បៀងអាហារ និងការផ្គត់ផ្គង់ បានជំរុញឱ្យហ្កាហ្សា ឆ្ពោះទៅរកភាពអត់ឃ្លាន៕