គណៈរដ្ឋមន្ត្រីសន្តិសុខរបស់នាយករដ្ឋមន្ត្រីអ៊ីស្រាអែល លោក Benjamin Netanyahu បានអនុម័តលើការពង្រីកប្រតិបត្តិការការវាយលុកបន្តិចម្តងៗ ប្រឆាំងនឹងក្រុមសកម្មប្រយុទ្ធប៉ាឡេស្ទីន ហាម៉ាស នៅតំបន់ហ្កាហ្សា នេះបើតាមការផ្សាយរបស់ទូរទស្សន៍ជាតិអ៊ីស្រាអែល Kan បានរាយការណ៍នៅថ្ងៃចន្ទ (០៥ ឧសភា) នេះដោយដកស្រង់ប្រភពជាច្រើនដែលដឹងពីសេចក្ដីលម្អិត។

មេបញ្ជាការកងទ័ពអ៊ីស្រាអែល លោក Eyal Zamir បាននិយាយនៅក្នុងសេចក្តីថ្លែងការណ៍មួយកាលពីថ្ងៃអាទិត្យថា យោធាអ៊ីស្រាអែលបានចាប់ផ្តើមចេញការកោះហៅកងកម្លាំងបម្រុងរាប់ម៉ឺននាក់រួចហើយ ដោយសម្លឹងមើលការពង្រីកយុទ្ធនាការហ្កាហ្សា។

ជាមួយគ្នានេះ គណៈរដ្ឋមន្ត្រីសន្តិសុខក៏បានអនុម័តផែនការថ្មីសម្រាប់ការចែកចាយជំនួយនៅក្នុងតំបន់ហ្កាហ្សាផងដែរ នេះបើតាមគេហទំព័រព័ត៌មាន Ynet របស់អ៊ីស្រាអែលបានរាយការណ៍នៅថ្ងៃចន្ទ ប៉ុន្តែគេមិនច្បាស់ទេថា នៅពេលណាការផ្គត់ផ្គង់នឹងត្រូវបានអនុញ្ញាតឱ្យចូលទៅក្នុងតំបន់ហ្កាហ្សាវិញ។

អ៊ីស្រាអែល បានបន្តប្រតិបត្តិការជើងគោកនៅតំបន់ហ្កាហ្សា ក្នុងខែមីនា ក្រោយការដួលរលំនៃបទឈប់បាញ់ គាំទ្រដោយអាមេរិក ដែលបានផ្អាកការប្រយុទ្ធអស់ពេលពីរខែ ក្រោយមក កងកម្លាំងខ្លួនបានគ្រប់គ្រងប្រហែលមួយភាគបីនៃដែនដីហ្កាហ្សា ហើយបានប្រឈមមុខនឹងសម្ពាធអន្តរជាតិកាន់តែខ្លាំងឡើង ដែលទាមទារឱ្យដកការបិទផ្លូវជំនួយទាំងស្រុងនៅហ្កាហ្សា ដែលខ្លួនបានដាក់តាំងតែពីខែមីនាមក៕