ភ្នំពេញ៖ មិត្តចិនបានសម្តែងការហួសចិត្ត និងជ្រេញចំពោះរដ្ឋាភិបាលអាមេរិក ដែលបានបន្តបង្ខូចឈ្មោះ លាបពណ៌មកលើប្រទេសកម្ពុជាច្រំដែលៗ ទាក់ទងនឹងទំនាក់ទំនងរវាងកម្ពុជានិងចិន ពិសេសការចោទប្រកាន់ អំពីវត្តមានកងទ័ពចិននៅកម្ពុជា។

នៅក្នុងផេកហ្វេសប៊ុកផ្លូវការរបស់ស្ថានទូតចិនប្រចាំនៅកម្ពុជា នាយប់ថ្ងៃទី៩ ខែធ្នូនេះ បានលើក​ឡើងថា ក្រសួងពាណិជ្ជកម្មអាមេរិក បានប្រកាសថា «អាមេរិក នឹងបន្ថែមវិធានការកំណត់ថ្មី​ឡើង​វិញ​លើការនាំចេញនូវប្រភេទទំនិញរសើបរបស់ខ្លួនមកកាន់កម្ពុជា និងព្រមទាំងមានការ​ហាមឃាត់​លក់អាវុធ ​និងសម្ភារយោធាដល់កម្ពុជា» ដោយក្រោមហេតុផលថា មានអំពើរំលោភបំពាន​សិទ្ធិ​មនុស្ស អំពើពុករលួយ និង​ការអនុញ្ញាត​បង្កើនវត្តមាន​យោធាចិនក្នុងប្រទេសកម្ពុជាជាដើម។

ចិន បានហៅការគំរាមកំហែងដាក់សម្ពាធ ​និងការដាក់ទណ្ឌកម្មមកលើកម្ពុជានេះ ថាជាទង្វើដែល​ប្រើ​អំណាចកៀប​សង្កត់​លើអ្នកដទៃយ៉ាងពិតប្រាកដ និងច្បាស់លាស់ ហើយបានល្មើសនឹងក្រម​ប្រតិបត្តិ​មូល​ដ្ឋាន នៃទំនាក់ទំនងអន្តរជាតិផងដែរ។

ផេកហ្វេសប៊ុកដដែល បានបញ្ជាក់ថា អ្នកនាំពាក្យក្រសួងការបរទេសចិន បានលើកឡើងថា ថ្មីៗនេះ អាមេរិក បន្តបង្ខូចឈ្មោះ ​និងលាបពណ៌លើទំនាក់ទំនង ​និងកិច្ចសហប្រតិបត្តិការរវាងចិន​ និងកម្ពុជា គំរាមកំហែងដាក់សម្ពាធ​ និងការដាក់ទណ្ឌកម្មមកលើកម្ពុជា។ នេះគឺជាទង្វើ ដែលប្រើអំណាចកៀប​សង្កត់​លើអ្នកដទៃយ៉ាងពិតប្រាកដ និងច្បាស់លាស់។ ​ទង្វើនេះ​ បានល្មើសនឹងក្រមប្រតិបត្តិមូលដ្ឋាន នៃទំនាក់ទំនងអន្តរជាតិផងដែរ។ ​ភាគីចិន ​ប្រឆាំងជាដាច់ខាតចំពោះទង្វើបែបនេះ»។

ប្រភពដដែលបានលើកឡើងទៀតថា ចិន និងកម្ពុជា គឺជាដៃគូកិច្ចសហប្រតិបត្តិការយុទ្ធ​សាស្ត្រ​គ្រប់​ជ្រុងជ្រោយ ជាមិត្តដែកថែប និងជាសហគមន៍វាសនារួម។ ចំណងមិត្តភាពជាប្រពៃណី នៃ​ប្រទេស​ទាំងពីរ ឆ្លងកាត់ការសាកល្បងតាមគ្រប់រូបភាព ធ្វើឱ្យកាន់តែរឹងមាំ មិនអាចបំបែកបាន។ គំនិតអាក្រក់ប៉ុនប៉ងរបស់អាមេរិកលើទំនាក់ទំនងចិន ​និងកម្ពុជា​ នឹងទទួលបរាជ័យ ខណៈភាគីចិន គាំទ្រកម្ពុជាយ៉ាងម៉ឺងម៉ាត់ ​ក្នុងការការពារអធិបតេយ្យភាពជាតិ ​និងសេចក្តីថ្លៃថ្នូរនៃជាតិ និង​គាំទ្រ​ឈរជាមួយប្រជាជនកម្ពុជាជារៀងរហូត៕

អត្ថបទ៖ បាន ចក់