ឯកអគ្គរដ្ឋទូតរុស្ស៊ីប្រចាំប្រទេសជប៉ុនលោក Nikolay Nozdrev បានប្រាប់ទីភ្នាក់ងារសារព័ត៌មាន TASS នៅក្នុងបទសម្ភាសន៍មួយថា ប្រទេសជប៉ុន នឹងក្លាយទៅជាជនរងគ្រោះដំបូងគេនៃល្បែងភូមិសាស្ត្រនយោបាយរបស់សហរដ្ឋអាមេរិក ដោយជៀសមិនផុត ក្នុងករណីមានជម្លោះនុយក្លេអ៊ែរ នៅក្នុងតំបន់។

លោកបាននិយាយថា៖«យើងចាត់ទុកថា គ្រោះថ្នាក់សម្រាប់ស្ថិរភាពក្នុងតំបន់ ដោយសារទីក្រុងតូក្យូកាន់តែចូលរួមនៅក្នុងគម្រោងផ្សេងៗនៃកិច្ចព្រមព្រៀងសន្ធិសញ្ញាការពារសម្ព័ន្ធមិត្ត ដែលពាក់ព័ន្ធនឹងអាវុធនុយក្លេអ៊ែររបស់សហរដ្ឋអាមេរិក។ ជាអកុសល រដ្ឋាភិបាលរបស់នាយករដ្ឋមន្ត្រីលោក Shigeru Ishiba គាំទ្រយ៉ាងពេញទំហឹងចំពោះវិធីសាស្រ្តរបស់សម្ព័ន្ធមិត្តដ៏សំខាន់របស់ខ្លួនសម្រាប់បញ្ហាសន្តិសុខជាយុទ្ធសាស្រ្ត ដោយមិនបានដឹងថា ប្រសិនបើឈានដល់ការអនុវត្តសេណារីយោនៃជម្លោះនុយក្លេអ៊ែររបស់អាមេរិកនោះ ប្រទេសជប៉ុន នឹងកា្លយជាជនរងគ្រោះដំបូងនៃល្បែងភូមិសាស្ត្រនយោបាយដ៏គ្រោះថ្នាក់របស់ទីក្រុងវ់ាស៊ីនតោន។ លោកបានបន្ថែមថា ភាគីរុស្ស៊ីក៏កំពុងតាមដានយ៉ាងដិតដល់ផងដែរនូវ«ព័ត៌មានអំពីការដាក់ពង្រាយមីស៊ីលរយៈចម្ងាយមធ្យម និងខ្លីរបស់អាមេរិក នៅលើទឹកដី» របស់ប្រទេស   ជប៉ុន។

ឯកអគ្គរដ្ឋទូតរុស្ស៊ីរូបនេះ ក៏បាននិយាយផងដែរថា ទីក្រុងមូស្គូ កំពុងយកចិត្តទុកដាក់ជាពិសេសចំពោះការបង្កើនសកម្មភាពយោធារបស់ភាគីជប៉ុន នៅជិតព្រំដែនភាគខាងកើតរបស់រុស្ស៊ី រួមទាំងទម្រង់ទ្វេភាគី និងពហុភាគី ដោយមានការចូលរួមជាដំបូងនៃកងកម្លាំងប្រដាប់អាវុធរបស់សហរដ្ឋអាមេរិក និងប្រទេសមួយចំនួនទៀតរបស់អង្គការណាតូ ក៏ដូចជាសម្ព័ន្ធមិត្តរបស់អាមេរិក នៅក្នុងតំបន់អាស៊ី-ប៉ាស៊ីហ្វិក។ លោកបានពន្យល់ថា៖«យើងព្រមានទីក្រុងតូក្យូជាទៀងទាត់ថា ប្រសិនបើសកម្មភាពបែបនេះ នៅតែបន្ត យើងនឹងត្រូវបង្ខំចិត្តចាត់វិធានការតបត ដើម្បីទប់ស្កាត់ការគំរាមកំហែងផ្នែកយោធាចំពោះប្រទេសរុស្ស៊ី»។