ការសិក្សាមួយដែលចេញផ្សាយនៅថ្ងៃចន្ទ (០៥ ឧសភា) នេះដោយអង្គការកុមារ Save the Children និង Plan International បានបង្ហាញថា កុមារអន្តោប្រវេសន៍ ដែលឆ្លងកាត់ព្រំដែនម៉ិកស៊ិកក្នុងក្តីសង្ឃឹមថានឹងទៅដល់សហរដ្ឋអាមេរិក កំពុងប្រឈមមុខនឹងកម្រិតនៃអំពើហឹង្សាដ៏គួរឱ្យព្រួយបារម្ភ ការមិនអើពើ និងភាពមិនច្បាស់លាស់ដែលអូសបន្លាយ នៅមុនពេល អំឡុងពេល និងក្រោយពេលធ្វើដំណើររបស់ពួកគេ។

របាយការណ៍នេះផ្អែកលើការសម្ភាសន៍ ១៥៥ករណី ដែលធ្វើឡើងនៅចន្លោះខែវិច្ឆិកា ឆ្នាំ២០២៤ និងខែកុម្ភៈ ឆ្នាំ២០២៥ បានរកឃើញថា កុមារដែលរត់ភៀសខ្លួនចេញពីគ្រោះថ្នាក់នៅកន្លែងកំណើតរបស់ពួកគេ ជារឿយៗមិនទទួលបានសុវត្ថិភាព និងការការពារអន្តរជាតិដែលពួកគេមានសិទ្ធិទទួលបាននោះទេ ប៉ុន្តែជាទម្រង់នៃភាពងាយរងគ្រោះថ្មី ដែលបន្តដកហូតសិទ្ធិទទួលបានការការពាររបស់ពួកគេ។

អ្នកសម្ភាសន៍ទាំងនោះមានអាយុចន្លោះពី ៧ ទៅ ១៦ឆ្នាំ ដោយពួកគេភាគច្រើនមកពីម៉ិកស៊ិក ហុងឌុយរ៉ាស និងវ៉េណេស៊ុយអេឡា ព្រមទាំងមកពីកូឡុំប៊ី ហ្គាតេម៉ាឡា និងទីតាំងឆ្ងាយជាច្រើនទៀតដូចជា អាហ្វហ្គានីស្ថាន និងហៃទីជាដើម។

គួរឱ្យដឹងថា ចំនួនកុមារដែលគ្មានអ្នកធ្វើដំណើរអមជាមួយក្នុងការឆ្លងកាត់ម៉ិកស៊ិក ទៅកាន់សហរដ្ឋអាមេរិក បានកើនឡើងទ្វេដងក្នុងប៉ុន្មានឆ្នាំថ្មីៗនេះ ដោយឡើងពីតួលេខ ៦៩.៤៨៨នាក់ក្នុងឆ្នាំ២០១៩ ទៅដល់ ១៣៧.២៧៥នាក់ក្នុងឆ្នាំ២០២៣ ជំរុញដោយការកើនឡើងនៃអំពើហិង្សា ភាពក្រីក្រកាន់តែស៊ីជម្រៅ និងការផ្លាស់ទីលំនៅ ដែលទាក់ទងនឹងបម្រែបម្រួលអាកាសធាតុ៕