សហរដ្ឋអាមេរិកគ្រោងនឹងបញ្ជូនប្រព័ន្ធការពារដែនអាកាសកម្រិតខ្ពស់ទៅកាន់ប្រទេសអ៊ុយក្រែន បន្ទាប់ពីលោក Donald Trump បានចុះហត្ថលេខាលើកិច្ចព្រមព្រៀងរ៉ែជាមួយទីក្រុងគីវ ហើយបានគំរាមដើរចេញពីក្នុងដំណើរការចរចាសន្តិភាព។

បើយោងតាមមន្ត្រី ៤រូប បានឲ្យដឹងថា ប្រព័ន្ធការពារ Patriot មួយគ្រឿង នឹងត្រូវបានធ្វើបម្លាស់ទីពីប្រទេសអ៊ីស្រាអែល បន្ទាប់ពីបានជួសជុលហើយ ខណៈដែលប្រព័ន្ធទី២ អាចត្រូវបានបញ្ជូនដោយប្រទេសអាល្លឺម៉ង់ ឬក្រិក។

គួររំលឹកថា លោក Trump បានផ្អាកការបញ្ជូនជំនួយផ្នែកយោធាទាំងអស់ទៅកាន់អ៊ុយក្រែន បន្ទាប់ពីមានជម្លោះជាមួយលោក Volodymyr Zelensky នៅក្នុងការិយាល័យប្រធានាធិបតី Oval។ ប៉ុន្តែចាប់តាំងពីពេលនោះមក លោកមានការខកចិត្តជាមួយនឹងការបដិសេធរបស់លោក Vladimir Putin ក្នុងការប្តេជ្ញាចិត្តចំពោះបទឈប់បាញ់ ហើយបានដកខ្លួនចេញពីការចរចាសន្តិភាពជាផ្លូវការ។

តែយ៉ាងណាក្ដី មន្ត្រីដែលនិយាយទៅកាន់សារព័ត៌មាន New York Times បានបដិសេធមិនបញ្ជាក់ថា តើការដឹកជញ្ជូនដែលបានស្នើឡើង បានឆ្លុះបញ្ចាំងពីការផ្លាស់ប្តូរវិធីសាស្រ្តរបស់ប្រធានាធិបតីសហរដ្ឋអាមេរិក ចំពោះអ៊ុយក្រែនដែរ ឬទេ។

កាលពីឆ្នាំមុន លោក Zelensky បានស្នើឲ្យសម្ព័ន្ធមិត្តលោកខាងលិចយ៉ាងហោចណាស់មានប្រព័ន្ធការពារ Patriot ចំនួន ៧គ្រឿង ដើម្បីការពារទីក្រុងនានារបស់អ៊ុយក្រែនពីការវាយប្រហារដោយមីស៊ីលរបស់រុស្ស៊ី។ ទីក្រុងគីវមានប្រព័ន្ធការពារ ៨គ្រឿង ប៉ុន្តែបច្ចុប្បន្នមានតែ ៦គ្រឿងប៉ុណ្ណោះដែលកំពុងដំណើរការ ខណៈដែល ២គ្រឿង ត្រូវបានគេរាយការណ៍ថា កំពុងត្រូវបានគេកែលម្អឲ្យកាន់តែទំនើប៕