ប្រធានាធិបតីអាមេរិក លោក Donald Trump បានបដិសេធថា លោកកំពុងពិចារណាពីអាណត្តិប្រធានាធិបតីទី៣ ជាចំណាត់ការដែលអ្នកជំនាញយល់ស្របជាមួយ ត្រូវបានហាមឃាត់ក្រោមរដ្ឋធម្មនុញ្ញរបស់សហរដ្ឋអាមេរិក។

អំឡុងបទសម្ភាសន៍ជាមួយប្រព័ន្ធផ្សព្វផ្សាយ NBC ក្នុងកម្មវិធី Meet the Press ដែលបានចាក់ផ្សាយកាលពីថ្ងៃអាទិត្យ (ទី៤ ខែឧសភា) លោក Trump បានប្រាប់អ្នកសម្របសម្រួលកម្មវិធី គឺពិធីការិនី Kristen Welker ថា៖ «ខ្ញុំនឹងធ្វើជាប្រធានាធិបតី ៨ឆ្នាំ ខ្ញុំនឹងក្លាយជាប្រធានាធិបតី ២ អាណត្តិ។ ខ្ញុំតែងតែគិតថា វាមានសារៈសំខាន់ខ្លាំងណាស់»។

គួររំលឹកថា លោក Trump ដែលមានវ័យ ៧៨ឆ្នាំ បាននិយាយនៅពីមុននេះថា លោក «មិននិយាយលេង» នោះទេ ពាក់ព័ន្ធនឹងចេតនាចង់កាន់តំណែងអាណត្តិទី ៣ ឬសូម្បីតែទី៤ ក្នុងនាមជាប្រធានាធិបតីសហរដ្ឋអាមេរិក។ តែក្រោយមកលើកបាននិយាយថា ការថ្លែងរបស់លោក គឺចង់មានន័យចម្អកឲ្យ «ប្រព័ន្ធផ្សព្វផ្សាយព័ត៌មានក្លែងក្លាយ»។

ក្រុមហ៊ុនរបស់លោក ដែលមានឈ្មោះថា The Trump Organization បាននឹងកំពុងលក់មួកមានអក្សរ «Trump 2028» ដោយបង្កើតឲ្យមានពាក្យចចាមអារ៉ាមអំពីព័ត៌មានដែលថា លោកអាចស្វែងរកការបន្តកាន់តំណែងបន្ទាប់ពីអាណត្តិទី២ របស់លោក បានបញ្ចប់ ក្នុងខែមករា ឆ្នាំ២០២៩។ នៅក្នុងបទសម្ភាសន៍ដែលបានថតទុកពីគេហដ្ឋានរបស់លោក ក្នុងរដ្ឋ Florida កាលពីថ្ងៃសុក្រចុងសប្ដាហ៍កន្លងមក លោក Trump បានបញ្ជាក់ថា លោកមាន «សំណើ» ពីមនុស្សជាច្រើនដែលបានស្នើឲ្យលោកពិចារណាស្វែងរកការបន្តកាន់តំណែង។

លោក Trump បាននិយាយប៉ុន្មានថ្ងៃបន្ទាប់ពីប្រារព្ធរយៈពេល ១០០ថ្ងៃដំបូងនៃអាណត្តិទី ២ របស់លោកថា «មានមនុស្សជាច្រើនចង់ឲ្យខ្ញុំធ្វើវា»។ តែលោក Trump បានបញ្ជាក់ថា៖ «វាជាអ្វីដែលខ្ញុំដឹងច្បាស់បំផុត អ្នកមិនត្រូវបានអនុញ្ញាតឲ្យធ្វើបែបនោះឡើយ។ ខ្ញុំមិនដឹងថា តើនោះជារដ្ឋធម្មនុញ្ញដែលមិនអនុញ្ញាតិឲ្យអ្នកធ្វើបែបហ្នឹង ឬអ្វីផ្សេងនោះទេ»។ លោកបានសង្កត់ធ្ងន់ថា «ប៉ុន្តែនេះ (ការស្វែងរកអាណត្តិទី៣) មិនមែនជាអ្វីដែលខ្ញុំកំពុងសម្លឹងដល់នោះឡើយ»។ ហើយលោកបានរាយបញ្ជីគណបក្សសាធារណរដ្ឋដែលអាចចូលជំនួសតំណែងរបស់លោក ក្នុងនោះមានរួមទាំងអនុប្រធានាធិបតី លោក JD Vance និងរដ្ឋមន្ត្រីការបរទេស លោក Marco Rubio ផងដែរ៕