ប្រធានាធិបតីអាមេរិក លោក Donald Trump កាលពីថ្ងៃអាទិត្យ (ទី៤ ខែឧសភា) បានបញ្ជាក់ថា លោកបានស្នើបញ្ជូនទាហានអាមេរិកទៅកាន់ប្រទេសម៉ិកស៊ិក ដើម្បីជួយប្រធានាធិបតីម៉ិកស៊ិក Claudia Sheinbaum ប្រយុទ្ធប្រឆាំងនឹងការជួញដូរគ្រឿងញៀន ជាការផ្តល់ជូនដែលលោកស្រី Sheinbaum បានបង្ហាញកាលពីថ្ងៃសៅរ៍ ហើយបាននិយាយថា លោកស្រីបានបដិសេធ។

អំឡុងពេលនិយាយទៅកាន់អ្នកសារព័ត៌មាននៅលើយន្តហោះ Air Force One នៅពេលលោកត្រលប់ពីរដ្ឋ Florida ទៅទីក្រុងវ៉ាស៊ីនតោន លោក Trump បានប្រាប់ថា លោកបានស្នើឡើងដោយសារតែក្រុមជួញដូរគ្រឿងញៀន គឺជា «មនុស្សអាក្រក់» ដែលទង្វើរបស់ពួកគេបានបណ្ដាលឲ្យមនុស្សរាប់ពាន់នាក់សា្លប់។ លោកបាននិយាយថា៖ «ប្រសិនបើម៉ិកស៊ិកចង់បានជំនួយប្រយុទ្ធប្រឆាំងជាមួយក្រុមឧក្រិដ្ឋកម្មនេះ ខ្ញុំមានក្ដីរីករាយក្នុងការចូលទៅជួយ»។

នៅពេលត្រូវបានសួរថា តើលោកខកចិត្តទេ ដែលលោកស្រី Sheinbaum បានបដិសេធសំណើនេះ លោក Trump បានឆ្លើយថា៖ «ខ្ញុំគិតថា លោកស្រី គឺជាស្ត្រីគួរឲ្យស្រឡាញ់។ ប្រធានាធិបតីម៉ិកស៊ិក គឺជាស្ត្រីគួរឲ្យស្រឡាញ់ ប៉ុន្តែលោកស្រីខ្លាចក្រុមឧក្រិដ្ឋកម្មដែលលោកស្រីមិនអាចសូម្បីតែគិតឲ្យបានច្បាស់លាស់»។

កាលពីថ្ងៃសៅរ៍ចុងសប្ដាហ៍កន្លងមក លោកស្រី Sheinbaum បានច្រានចោលការស្នើរបស់លោក Trump ដោយផ្ដល់ហេតុផលថា «អធិបតេយ្យភាពមិនមែនសម្រាប់លក់នោះទេ»។ ការអត្ថាធិប្បាយរបស់លោកបានឆ្លើយតបទៅនឹងសំណួរ អំពីរបាយការណ៍របស់សារព័ត៌មាន Wall Street Journal ដែលត្រូវបានចេញផ្សាយកាលពីថ្ងៃទី២ ខែឧសភា ដែលបានលើកឡើងថា លោក Trump កំពុងដាក់សម្ពាធដល់ម៉ិកស៊ិកឲ្យអនុញ្ញាតឲ្យមានការចូលរួមកាន់តែស៊ីជម្រៅរបស់យោធាអាមេរិកប្រឆាំងនឹងក្រុមជួញដូរគ្រឿងញៀន ដើម្បីប្រយុទ្ធប្រឆាំងនឹងការជួញដូរឆ្លងកាត់ព្រំដែនរួម៕