នៅថ្ងៃចន្ទនេះ អ៊ីរ៉ង់ បានច្រានចោលទាំងស្រុងការគាំទ្រការវាយប្រហាររបស់ក្រុមឧទ្ទាមហ៊ូធីលើអាកាសយានដ្ឋានសំខាន់របស់អ៊ីស្រាអែល ក្រោយក្រុមឧទ្ទាមប្រកាសទទួលស្គាល់ការវាយប្រហារមីស៊ីល កាលពីរយៈពេល ១ថ្ងៃមុន ។

ក្រសួងការបរទេសអ៊ីរ៉ង់ និយាយនៅក្នុងសេចក្តីថ្លែងការណ៍ថា សកម្មភាពរបស់យេម៉ែន ក្នុងការគាំទ្រជនប៉ាឡេស្ទីន គឺជាការសម្រេចចិត្តឯករាជ្យ ធ្វើឡើងដើម្បីបង្ហាញសាមគ្គីភាពជាមួយពួកគេ ។

មីស៊ីល ១គ្រាប់បាញ់ដោយក្រុមឧទ្ទាមហ៊ូធីឆ្ពោះទៅកាន់អ៊ីស្រាអែលកាលពីថ្ងៃអាទិត្យ បានធ្លាក់នៅជិតអាកាសយានដ្ឋានអន្តរជាតិ Ben Gurion បណ្តាលឲ្យមានភាពស្លន់ស្លោនៅក្នុងចំណោមអ្នកដំណើរ និងធ្វើឲ្យមានការគំរាមសងសឹកប្រឆាំងក្រុមឧទ្ទាមហ៊ូធី និងប្រទេសអ៊ីរ៉ង់ ។ មនុស្ស ៦នាក់ បានរងរបួស ហើយការហោះហើរត្រូវបានផ្អាកអស់មួយរយៈពេលខ្លី ។

ក្រុមឧទ្ទាមហ៊ូធីគាំទ្រដោយអ៊ីរ៉ង់ ប្រកាសទទួលស្គាល់ ដោយពួកគេនិយាយថា ពួកគេបានបាញ់មីស៊ីលបាលីស្ទិកល្បឿនលឿនជាងសំឡេង លើអាកាសយានដ្ឋាន Ben Gurion និងបានប្រមានវាយប្រហារ លើអាកាសយានដ្ឋានជាច្រើនទៀតរបស់អ៊ីស្រាអែល ។

ខណៈពេលនោះដែរ នាយករដ្ឋមន្រ្តីអ៊ីស្រាអែលលោក Benjamin Netanyahu សន្យាឆ្លើយតបយ៉ាងម៉ឺងម៉ាត់ចំពោះក្រុមឧទ្ទាមហ៊ូធី និងអ៊ីរ៉ង់ ជុំវិញការវាយប្រហារមួយនេះ ។

នៅក្នុងវីដេអូចេញផ្សាយលើបណ្តាញព័ត៌មានសង្គម Telegram លោក Netanyahu និយាយថា អ៊ីស្រាអែលនឹងធ្វើប្រឆាំងក្រុមហ៊ូធី ដូចកាលពីមុន ហើយនិងបន្តធ្វើនៅពេលអនាគត ៕