ក្រុមមន្ត្រីបានប្រាប់ឲ្យដឹងថា រដ្ឋមន្ត្រីការបរទេសអ៊ីរ៉ង់ បានធ្វើដំណើរទៅដល់រដ្ឋធានីរបស់ប្រទេសប៉ាគីស្ថានហើយ នៅថ្ងៃចន្ទ (ទី៥ ខែឧសភា) នេះ សម្រាប់ដំណើរទស្សនកិច្ចមួយថ្ងៃ ដើម្បីជួបថ្នាក់ដឹកនាំជាន់ខ្ពស់ ស្របពេលប្រទេសនេះមានភាពតានកាន់តែខ្លាំងជាមួយប្រទេសជិតខាងឥណ្ឌា ក្រោយការវាយប្រហារមួយបានសម្លាប់ភ្ញៀវទេសចរកាលពីខែមុន នៅក្នុងតំបន់ដែលមានជម្លោះ គឺកាស្មៀរ។

ឥណ្ឌាបានចោទប៉ាគីស្ថានថា មានជាប់ពាក់ព័ន្ធនឹងការវាយប្រហារដ៏អាក្រក់នេះ ជាការចោទប្រកាន់ដែលក្រុងអ៊ីស្លាម៉ាបាដបដិសេធ។ ហើយប្រទេសនេះបង្ហើបថា ខ្លួនមាននូវ «ព័ត៌មានស៊ើបការណ៍សម្ងាត់» ដ៏គួរឲ្យទុកចិត្ត ដែលថា ឥណ្ឌាមានបំណងចាប់ផ្តើមវិធានការយោធា ដោយនាំឲ្យមានការរំពឹងទុកពីការកើតសង្គ្រាម រវាងគូប្រជែងប្រដាប់អាវុធនុយក្លេអ៊ែរទាំង២។

ការិយាល័យការបរទេសរបស់ប៉ាគីស្ថានមិនបានលើកឡើងឲ្យបានច្បាស់លាស់នោះឡើយថា តើរដ្ឋមន្ត្រីការបរទេសអ៊ីរ៉ង់ លោក Abbas Araqchi នឹងពិភាក្សាអំពីការប្រឈមមុខដាក់គ្នានេះដែរ ឬអត់ ប៉ុន្តែឯកអគ្គរដ្ឋទូតអ៊ីរ៉ង់ លោក Reza Amiri Moghadam បានប្រាប់ប្រព័ន្ធផ្សព្វផ្សាយរដ្ឋថា បញ្ហានេះនឹងស្ថិតក្នុងរបៀបវារៈ។

លោកឯកអគ្គរដ្ឋទូតបានបញ្ជាក់បន្ថែមថា៖ «ដោយសារទំនាក់ទំនងជិតស្និទ្ធរបស់អ៊ីរ៉ង់ ទាំងជាមួយប៉ាគីស្ថាន និងឥណ្ឌា មធ្យោបាយនៃការកាត់បន្ថយភាពតានតឹង ក្នុងឧបទ្វីបនេះ នឹងស្ថិតក្នុងចំណោមបញ្ហាផ្សេងៗ ដែលត្រូវបានលើកយកមក អំឡុងកិច្ចប្រជុំរបស់លោក Araqchi»។

លោក Araqchi ដែលនឹងមានវត្តមាននៅក្នុងទីក្រុងអ៊ីស្លាម៉ាបាដមួយថ្ងៃ ត្រូវបានគេរំពឹងថា នឹងទៅកាន់ទីក្រុងដេលីរបស់ប្រទេសឥណ្ឌា នៅចុងសប្តាហ៍នេះ។ គេមិនទាន់ច្បាស់នៅឡើយទេថា តើដំណើរទស្សនកិច្ចនេះត្រូវបានគ្រោងទុកតាំងពីមុនពេលមានភាពតានតឹងចុងក្រោយនេះដែរ ឬយ៉ាងណា៕