ភ្នំពេញ៖ សម្ដេចតេជោ ហ៊ុន សែន បានថ្លែងសារថា បច្ចុប្បន្នសិទ្ធិសេរីភាព សម្រាប់ប្រជាពលរដ្ឋកម្ពុជា គឺមានពេញលេញហើយសិទ្ធិសេរីភាពនេះ បានធ្វើឲ្យកម្ពុជាកាន់តែរីកចម្រើនជឿនលឿនទៅមុខមកដល់សព្វថ្ងៃនេះ។

ខណៈថ្ងៃនេះជាខួបលើកទី៧៣ នៃទិវាសិទ្ធិមនុស្សអន្តរជាតិ១០ ធ្នូ១៩៤៨-១០ ធ្នូ ២០២១ សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានបង្ហោះសារនៅលើទំព័រសង្គម​ហ៊្វេសប៊ុក​ថា បច្ចុប្បន្នសិទ្ធិសេរីភាពគឺបានធ្វើឲ្យប្រជាពលរដ្ឋរស់នៅ និងប្រកបការងារតូចធំ ជ្រើសរើស​ជំនឿ​សាសនា និងសិទ្ធិបោះឆ្នោតជ្រើសតាំងមេដឹកនាំ​ ដែលខ្លួនពេញចិត្តដោយសេរី ហើយសិទ្ធិសេរីភាព ក៏បានធ្វើឲ្យកម្ពុជាកាន់ តែរីកចម្រើនជឿនលឿនទៅមុខ។

សម្ដេចបានរំលឹកថា កាលពីប្រទេសកម្ពុជាឋិតក្នុងរបបប៉ុល ពត គឺប្រជាពលរដ្ឋ គ្មាន​សិទ្ធិសេរីភាព​អ្វីទាំងអស់ ​សូម្បីតែសិទ្ធិរស់រានមានជីវិត ​សិទ្ធិទទួលទានអាហារ ​សិទ្ធិពិនិត្យព្យាបាលជំងឺ សិទ្ធិ​ជំនឿសាសនា សិទ្ធិសិក្សាអប់រំ សិទ្ធិជ្រើសរើសតំណាង ​និងសិទ្ធិបញ្ចេញមតិ សិទ្ធិរៀប​អាពាហ៍ពិពាហ៍ និង​សិទ្ធិប្រកបការងារជាដើម ។ល។

សម្តេចតេជោ បានបន្តថា របបប្រល័យពូជសាសន៍ប៉ុល ពត បានដកហូតសិទ្ធិសេរីភាពទាំងអស់ ហើយ​បាន​បង្ខំឱ្យពលរដ្ឋទាំងក្មេងចាស់ប្រុសស្រីធ្វើការហួសកម្លាំង ​ឈឺស្លាប់​ដោយគ្មានពេទ្យ និង​ថ្នាំព្យាបាល ព្រមទាំងបានបណ្ដាលឱ្យប្រជាពលរដ្ឋជាង ៣លាននាក់បានស្លាប់ ក្នុង​រយៈពេលតែ៣ឆ្នាំ ៨ខែ ២០ថ្ងៃ។

សម្តេចតេជោ បានបញ្ជាក់ថា សិទ្ធិសេរីភាពរបស់កម្ពុជា​ ដែលមានដូចពេលបច្ចុប្បន្ននេះ គឺត្រូវ​បាន​រំដោះយកមកវិញនៅក្រោយពេលដែលរបបប្រល័យពូជសាសន៍ប៉ុល ពត ត្រូវបាន​វាយ​ផ្តួល​រំលំទាំង​ស្រុង​នៅថ្ងៃទី០៧ ខែមករា ឆ្នាំ១៩៧៩៕

អត្ថបទ៖ មុត សុទ្ធ