បើយោងតាមអ្នកសរសេរប្លុកសង្គ្រាមរុស្ស៊ី បានឲ្យដឹងថា នៅថ្ងៃចន្ទ (ទី៥ ខែឧសភា) នេះ កងកម្លាំងអ៊ុយក្រែន បានវាយប្រហារតំបន់ Kursk ភាគខាងលិចរបស់រុស្ស៊ី ដោយបានបាញ់មីស៊ីល សម្រុកចូលតាមព្រំដែន ហើយបន្ទាប់មកឆ្លងកាត់វាលមានគ្រាប់មីនដោយប្រើរថយន្តពិសេស។

ឧត្តមសេនីយ៍ជាន់ខ្ពស់របស់រុស្ស៊ី បាននិយាយកាលពីខែមុនថា កងទ័ពអ៊ុយក្រែនត្រូវបានវាយឲ្យដកចេញពីតំបន់ Kursk ដោយបញ្ចប់ការលុកលុយដ៏ធំបំផុត នៅក្នុងដែនដីរុស្ស៊ី គិតចាប់តាំងពីសង្គ្រាមលោកលើកទី២ ហើយថា រុស្ស៊ីកំពុងបង្កើតតំបន់ទ្រនាប់ នៅក្នុងតំបន់ជិតខាង Sumy របស់ប្រទេសអ៊ុយក្រែន។

អ្នកសរសេរប្លុកសង្គ្រាមឈ្មោះ «RVvoenkor» បានឲ្យដឹងនៅលើកម្មវិធីផ្ញើសារ Telegram ថា៖ «សត្រូវបានបំផ្ទុះស្ពានដោយគ្រាប់រ៉ូកែត នាពេលយប់ ហើយបានបើកការវាយប្រហារជាមួយក្រុមពាសដែក នាពេលព្រឹក។ រថយន្តបោសសម្អាតគ្រាប់មីន បានចាប់ផ្តើមឆ្លងកាត់វាលគ្រាប់មីន ហើយតាមមកដោយរថពាសដែកដែលមានកងទ័ព។ មានការប្រយុទ្ធគ្នាយ៉ាងខ្លាំងក្លា បានកើតឡើងនៅព្រំដែន»។

ការវាយប្រហាររបស់អ៊ុយក្រែននៅទីក្រុង Kursk ត្រូវបានរាយការណ៍ដោយអ្នកសរសេរប្លុករុស្ស៊ីជាច្រើននាក់ផ្សេងទៀត ក្នុងនោះរួមទាំងប្លុកដែលមានរហស្សនាម «The Archangel of Special Forces» និងពីអ្នកឆ្លើយឆ្លងព័ត៌មានសង្គ្រាមទូរទស្សន៍រដ្ឋរុស្ស៊ី គឺលោក Alexander Sladkov។

ភ្លាមៗ មិនទាន់មានការអត្ថាធិប្បាយអ្វីឡើយទាំងពីរុស្ស៊ី ឬអ៊ុយក្រែន ប៉ុន្តែអ្នកសរសេរប្លុកសង្គ្រាមរុស្ស៊ី បានចេញផ្សាយផែនទីបង្ហាញពីកងកម្លាំងអ៊ុយក្រែនដែលកំពុងព្យាយាមឆ្លងចូលព្រំដែនរុស្ស៊ី នៅទីតាំងចំនួន២ ឆ្ពោះទៅរកតំបន់ទីក្រុង Tyotkino៕