នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយថា ការវាយលុកថ្មីនៅក្នុងតំបន់ ហ្កាហ្សាស្ទ្រីប ដែលត្រូវបានឡោមព័ទ្ធ នឹងក្លាយជាប្រតិបត្តិការយោធាដ៏ខ្លាំងក្លាមួយ ក្នុងគោលបំណងកម្ចាត់ក្រុមហាម៉ាស។

នៅក្នុងសារវីដេអូជាភាសាហេប្រ៊ូលើបណ្ដាញសង្គម X ដោយនិយាយទៅកាន់ផែនការដែលត្រូវបានអនុម័តដោយគណៈរដ្ឋមន្ត្រីសន្តិសុខ ដើម្បីពង្រីកការវាយលុកនៅដែនដីហ្កាហ្សានោះ លោក Netanyahu បាននិយាយកាលពីថ្ងៃចន្ទថា ប្រជាជនប៉ាឡេស្ទីននៅហ្កាហ្សា នឹងត្រូវបានផ្លាស់ប្តូរទីតាំងក្នុងហេតុផលសម្រាប់ការពារខ្លួន។

១៨ខែនៃការវាយប្រហាររបស់អ៊ីស្រាអែលបានសម្លាប់ជនជាតិប៉ាឡេស្ទីនជាង៥២.០០០នាក់ក្នុងតំបន់ហ្កាហ្សា រួមទាំងកុមាររាប់ពាន់នាក់ និងមនុស្សជិត១២០.០០០នាក់ផ្សេងទៀតរងរបួស។

លោក Netanyahu ក៏បាននិយាយដែរថា ទាហានអ៊ីស្រាអែលនឹងមិនចូលទៅក្នុងតំបន់ហ្កាហ្សា បើកការវាយឆ្មក់ ហើយបន្ទាប់មកដកថយមកបវិញនោះឡើយ។ លោកបានថ្លែងថា បំណងគឺផ្ទុយពីនោះទាំងស្រុង។

ការលើកឡើងរបស់លោកធ្វើឡើងទន្ទឹមនឹងក្រុមមេដឹកនាំនយោបាយ និងយោធារបស់អ៊ីស្រាអែល បានអនុម័តផែនការពង្រីកការវាយលុកនៅតំបន់ហ្កាហ្សា។ 

គណៈរដ្ឋមន្ត្រីរបស់លោក Netanyahu បានអនុម័តជាឯកច្ឆ័ន្ទនូវផែនការដើម្បីកោះហៅក្រុមទាហាន      បម្រុង និងដាក់ពង្រាយយោធាអ៊ីស្រាអែលទទួលបន្ទុកគ្រប់គ្រងអាហារ និងការផ្គត់ផ្គង់សំខាន់ៗផ្សេងទៀតដល់ប្រជាជនចំនួន២,៣លាននាក់ ដែលកំពុងរងទុក្ខក្រោមការបិទផ្លូវរបស់ខ្លួនក្នុងតំបន់ហែកហួរដោយសង្រ្គាមឥតឈប់ឈរមួយនេះ ៕