ប៉ាគីស្ថាន បានធ្វើតេស្តមីស៊ីលជាលើកទីពីរក្នុងរយៈពេល ៣ថ្ងៃកាលពីថ្ងៃចន្ទ (០៥ ឧសភា) ហើយឥណ្ឌា បាននិយាយថា ខ្លួនបានបញ្ជាឱ្យរដ្ឋជាច្រើនធ្វើសមយុទ្ធសន្តិសុខ ខណៈភាពតានតឹងមិនអន់ថយ ស្របពេលការភ័យខ្លាចថាប្រទេសជិតខាងទាំងពីរអាចឈានទៅដល់ការប្រឈមមុខដាក់គ្នាជុំវិញការវាយប្រហារអ្នកទេសចរនៅតំបន់កាស្មៀរ។

ក្រុមហ៊ុនវាយតម្លៃទំនុកចិត្តហិរញ្ញវត្ថុ Moody's បានព្រមានថា ការប្រឈមមុខដាក់គ្នាអាចទម្លាក់ការកែទម្រង់សេដ្ឋកិច្ចរបស់ទីក្រុងអ៊ីស្លាម៉ាបាដ ខណៈមហាអំណាចពិភពលោកបានអំពាវនាវឱ្យមានភាពស្ងប់ស្ងាត់។ ទំនាក់ទំនងរវាងរដ្ឋមានអាវុធនុយក្លេអ៊ែរទាំងពីរ បានធ្លាក់ចុះខ្លាំងចាប់តាំងពីខ្មាន់កាំភ្លើងសម្លាប់មនុស្ស ២៦នាក់កាលពីថ្ងៃទី២២ ខែមេសា ក្នុងតំបន់កាស្មៀរ របស់ឥណ្ឌា ដែលជាការវាយប្រហារដ៏អាក្រក់បំផុតលើជនស៊ីវិលនៅឥណ្ឌា អស់ជិតពីរទសវត្សរ៍។

ប្រភពរដ្ឋាភិបាលមួយបានប្រាប់សារព័ត៌មានរ៉យទ័រកាលពីថ្ងៃចន្ទថា ក្រសួងមហាផ្ទៃរបស់ឥណ្ឌា បានស្នើឱ្យរដ្ឋមួយចំនួនធ្វើសមយុទ្ធសន្តិសុខនៅថ្ងៃទី០៧ ខែឧសភា ដើម្បីធានាបាននូវការត្រៀមលក្ខណៈស៊ីវិល ប៉ុន្តែមិនបញ្ជាក់ថារដ្ឋណាខ្លះ ឬនិយាយអំពីប៉ាគីស្ថាន ឬតំបន់កាស្មៀរទេ។

នៅមុននោះ កងទ័ពប៉ាគីស្ថាននិយាយថា ខ្លួនបានសាកល្បងមីស៊ីលបាញ់ពីដីទៅដី ស៊េរី Fatah រយៈចម្ងាយ ១២០គីឡូម៉ែត្រ រយៈពេលពីរថ្ងៃបន្ទាប់ពីការបាញ់បង្ហោះដោយជោគជ័យនូវមីស៊ីលបាលីស្ទិកបាញ់ពីដីទៅដី Abdali រយៈចម្ងាយ ៤៥០គីឡូម៉ែត្រ។

ឥណ្ឌា បានចោទប៉ាគីស្ថាន ថាជាប់ពាក់ព័ន្ធនឹងការវាយប្រហារនៅកាស្មៀរ ប៉ុន្តែទីក្រុងអ៊ីស្លាម៉ាបាដ បានបដិសេធ ហើយនិយាយថា ខ្លួនមានព័ត៌មានសម្ងាត់ថា ទីក្រុងញូវដេលី មានបំណងចាប់ផ្តើមសកម្មភាពយោធាប្រឆាំងនឹងខ្លួនក្នុងពេលឆាប់ៗ៕