អ៊ុយក្រែន បានប្រើយានដ្រូនដាក់គោលដៅលើទីក្រុងមូស្គូប៉ុន្មានថ្ងៃមុនពេលលោក Vladimir Putin គ្រោងរៀបចំធ្វើជាម្ចាស់ផ្ទះទទួលក្រុមមេដឹកនាំពិភពលោកក្នុងព្យុហយាត្រាទិវាជ័យជម្នះនៅទូទាំងរដ្ឋធានី។ការវាយប្រហារដោយយានដ្រូនអ៊ុយក្រែនក៏បានបណ្ដាលឲ្យបិទអាកាសយានដ្ឋានក្រុងមូស្គូផងដែរ។

រុស្ស៊ី ត្រូវបង្ខំចិត្តលុបចោលព្រឹត្តិការណ៍គម្រប់ខួបសង្គ្រាមលោកលើកទីពីរនៅគ្រីម៉េ ដែលខ្លួនបានកាន់កាប់ដោយសារតែការព្រួយបារម្ភផ្នែកសន្តិសុខ។ 

លោក Volodymyr Zelensky ប្រធានាធិបតីអ៊ុយក្រែន បាននិយាយថា លោកមិនអាចធានាសុវត្ថិភាព នៃគណៈប្រតិភូ ដែលចូលរួមក្នុងការព្យុហយាត្រាទូទាំងទីក្រុងមូស្គូ នៅថ្ងៃសុក្រសប្ដាហ៍នេះ ដែលនឹងមានការចូលរួមដោយមេដឹកនាំចិនលោក Xi Jinping នោះបានទេ។

ព្យុហយាត្រានេះបានកើតឡើងស្របពេលកងកម្លាំងអ៊ុយក្រែនបានបើកការលុកលុយលើកទីពីរចូលទៅក្នុងតំបន់ Kursk របស់រុស្ស៊ី ដោយបានទម្លាយព្រំដែន និងបំផ្លាញស្ពាន។

កាលពីថ្ងៃចន្ទ ទីក្រុង Kyiv បានបាញ់យានដ្រូនជាច្រើនគ្រឿងទៅកាន់ប្រទេសរុស្ស៊ី ដោយអភិបាលក្រុងមូស្គូរាយការណ៍ពីការស្ទាក់ចាប់បានចំនួន៤គ្រឿងនៅជិតទីក្រុង។ការវាយប្រហារនេះបានរំខានដល់ការធ្វើដំណើរតាមផ្លូវអាកាសជាបណ្តោះអាសន្ននៅអាកាសយានដ្ឋាន Domodedovo ប្រហែលមួយម៉ោងកន្លះ។ 

គួររម្លឹកថា លោក Putin បានប្រកាសបទឈប់បាញ់រយៈពេលបីថ្ងៃចាប់ពីថ្ងៃទី ៨ ដល់ថ្ងៃទី១០ ខែឧសភា ដែលជាការប្រារព្ធខួបលើកទី ៨០ នៃជ័យជម្នះរបស់សូវៀត និងសម្ព័ន្ធមិត្ត ខណៈលោក Zelensky បានអំពាវនាវឱ្យបញ្ឈប់អរិភាពបន្ថែមទៀត៕