សហភាពអឺរ៉ុប កាលពីថ្ងៃចន្ទ (០៥ ឧសភា) បានអំពាវនាវឱ្យមានការអត់ធ្មត់ខ្លាំងពីអ៊ីស្រាអែល និងកុំបង្កើនប្រតិបត្តិការសឹកនៅក្នុងសង្រ្គាមដែលកំពុងបន្ត បន្ទាប់ពីគណៈរដ្ឋមន្ត្រីសន្តិសុខរបស់ប្រទេសនេះបានអនុម័តលើការពង្រីកប្រតិបត្តិការយោធានៅក្នុងតំបន់ហ្កាហ្សា។

អុ្នកនាំពាក្យគណៈកម្មាធិការអឺរ៉ុប Anouar El Anouni បាននិយាយក្នុងសន្និសីទសារព័ត៌មានកាលពីថ្ងៃចន្ទថា "សហភាពអឺរ៉ុបព្រួយបារម្ភខ្លាំងចំពោះផែនការបន្តប្រតិបត្តិការដោយកងកម្លាំងអ៊ីស្រាអែលនៅតំបន់ហ្កាហ្សា ដែលនឹងបណ្តាលឱ្យមានអ្នកស្លាប់ និងរបួសបន្ថែមទៀតសម្រាប់ប្រជាជនប៉ាឡេស្ទីន។ ប្លុកអឺរ៉ុបជំរុញឱ្យអ៊ីស្រាអែលអត់ធ្មត់បំផុត និងកុំបង្កើនការវាយប្រហារយោធាទៅលើដែនដីនេះ"។

តាមសេចក្តីរាយការណ៍បានឱ្យដឹងថា ផែនការរបស់អ៊ីស្រាអែល រួមមានការដណ្តើមយក និងកាន់កាប់ទឹកដីនៅតំបន់ហ្កាហ្សាស្ទ្រីបទាំងមូល ជាកន្លែងដែលខ្លួនបានធ្វើសង្រ្គាមប្រឆាំងនឹងពួកសកម្មប្រយុទ្ធហាម៉ាស ចាប់តាំងពីខែតុលា ឆ្នាំ២០២៣ មក។ អង្គការសហប្រជាជាតិ និយាយថា ទង្វើនេះនឹងបំពានគោលការណ៍មនុស្សធម៌ជាមូលដ្ឋាន។

ដំណាក់កាលយោធាថ្មីនេះត្រូវបានគេរាយការណ៍ថានឹងចាប់ផ្តើមបន្ទាប់ពីដំណើរទស្សនកិច្ចរបស់ប្រធានាធិបតីអាមេរិក លោក Donald Trump ទៅកាន់មជ្ឈិមបូព៌ា ដែលគ្រោងធ្វើនៅថ្ងៃទី ១៣-១៦ ខែឧសភា ហើយក៏កើតឡើងបើទោះបីជាមានការព្រមានម្តងហើយម្តងទៀតពីអង្គការសហប្រជាជាតិថាជា "ការរំលោភបំពានយ៉ាងធ្ងន់ធ្ងរ" នៃច្បាប់អន្តរជាតិនៅក្នុងតំបន់ហ្កាហ្សា៕