ឯកសារផ្ទៃក្នុងរបស់អង្គការសហប្រជាជាតិ មើលឃើញដោយសារព័ត៌មានរ៉យទ័រ បានបង្ហាញថា សហរដ្ឋអាមេរិក កំពុងស្វះស្វែងធ្វើឱ្យចុះខ្សោយនូវកិច្ចព្រមព្រៀងសកលផ្នែកហិរញ្ញវត្ថុមួយ ដែលមានគោលបំណងជួយប្រទេសកំពុងអភិវឌ្ឍ ដែលជួបការលំបាកជាមួយនឹងផលប៉ះពាល់នៃបម្រែបម្រួលអាកាសធាតុ និងបញ្ហាផ្សេងៗទៀត។

រដ្ឋបាលលោកប្រធានាធិបតី Donald Trump បានជំទាស់នឹងសេចក្តីព្រាងកំណែទម្រង់នៃប្រព័ន្ធហិរញ្ញវត្ថុរបស់ពិភពលោក ដែលមានបំណងជួយប្រទេសកំពុងអភិវឌ្ឍ រួមទាំងជុំវិញការយកពន្ធ ការវាយតម្លៃទំនុកចិត្តឥណទាន និងការឧបត្ថម្ភធនលើឥន្ធនៈហ្វូស៊ីលផងដែរ។

ឯកសារដែលមិនត្រូវបានរាយការណ៍ពីមុនមកនេះ បង្ហាញឱ្យឃើញថា រដ្ឋបាលលោក Trump កំពុងបង្កើតរបៀបវារៈ "យកអាមេរិកជាធំ" រួមទាំងការប្រឆាំងទៅនឹងកិច្ចខិតខំប្រឹងប្រែងដើម្បីបន្ថយបម្រែបម្រួលអាកាសធាតុ និងលើកកម្ពស់ភាពចម្រុះជំនាញ លើស្ថាប័នដែលជាចំណុចស្នូលនៃការជួសជុលវិបត្តិប្រព័ន្ធសកល។

ជាមួយនឹងការផ្លាស់ប្តូរជាបន្តបន្ទាប់នៅធនាគារពិភពលោក និងមូលនិធិរូបិយវត្ថុអន្តរជាតិ IMF ក្នុងការប្រយុទ្ធប្រឆាំងនឹងបម្រែបម្រួលអាកាសធាតុ កំពុងប្រឈមនឹងការរុញច្រានពីលោក Scott Bessent ប្រធានរតនាគារសហរដ្ឋអាមេរិករួចទៅហើយ ឯកសារនេះបានបង្ហាញថា ទីក្រុងវ៉ាស៊ីនតោនកំពុងចង់ទម្លាក់កំណែទម្រង់ដែលត្រៀមជាយូរមករបស់អង្គការសហប្រជាជាតិ៕