បន្ទាប់ពីដំណើរការអស់ជាងពីរទសវត្សរ៍ក្នុងនាមជាអ្នកត្រួសត្រាយផ្លូវនៃការហៅទូរសព្ទ និងផ្ញើសារតាមអ៊ីនធឺណិតរបស់ពិភពលោក ពេលនេះកម្មវិធី Skype ត្រូវបានក្រុមហ៊ុន Microsoft បិទជាផ្លូវការនៅថ្ងៃទី០៥ ខែឧសភា ឆ្នាំ២០២៥ ម្សិលមិញនេះ។ ក្រុមហ៊ុន Microsoft កំពុងជំរុញឱ្យអ្នកប្រើប្រាស់ Skype ទាំងអស់ប្ដូរទៅកាន់កម្មវិធីជជែកថ្មីរបស់ខ្លួនឈ្មោះថា Microsoft Teams ដែលជាការបញ្ចប់នៃយុគសម័យអ៊ីនធឺណិតដំបូងដ៏មានឥទ្ធិពលបំផុតមួយសម្រាប់វេទិកាទំនាក់ទំនងមួយនេះ។

បើកដំណើរការដំបូងក្នុងឆ្នាំ២០០៣ កម្មវិធី Skype បានបង្កើតបដិវត្តន៍ពីមធ្យោបាយដែលមនុស្សភ្ជាប់ទំនាក់ទំនងគ្នានៅទូទាំងទ្វីប ដោយបង្កើតការហៅទូរសព្ទជាវីដេអូ និងជាសំឡេងដែលមានតម្លៃទាប និងឥតគិតថ្លៃសម្រាប់មនុស្សរាប់លាននាក់។ នៅកម្រិតខ្ពស់បំផុតមួយ វេទិកានេះមានអ្នកប្រើប្រាស់ជាង ៣០០លាននាក់នៅទូទាំងពិភពលោក។

យ៉ាងណាក៏ដោយ ភាពសំខាន់របស់អេបនេះបានថយចុះប៉ុន្មានឆ្នាំមកនេះ ដោយសារវេទិកាថ្មីជាច្រើនដែលរួមបញ្ចូលគ្នាកាន់តែទូលំទូលាយ ដូចជា Zoom, Google Meet និង WhatsApp ជាដើមបានទទួលការចាប់អារម្មណ៍ ហើយនៅពេលដែលក្រុមហ៊ុន Microsoft បានផ្លាស់ប្តូរការផ្តោតជាយុទ្ធសាស្ត្ររបស់ខ្លួន។ Microsoft បានទិញ Skype ក្នុងឆ្នាំ២០១១ ប៉ុន្តែអេបនេះជួបភាពរអាក់រអួលចាប់តាំងពីការចាប់ផ្តើមនៃកម្មវិធីជជែកថ្មី Microsoft Teams ក្នុងឆ្នាំ២០១៦មក។

ក្រុមហ៊ុនបច្ចេកវិទ្យាខ្នាតយក្សមួយនេះ បានផ្តល់អាទិភាពជាច្រើនឆ្នាំដល់ Microsoft Teams ជាជាង Skype ហើយការសម្រេចចិត្តបិទអេបនេះបានឆ្លុះបញ្ចាំងពីបំណងប្រាថ្នារបស់ Microsoft ក្នុងការសម្រួលកម្មវិធីទំនាក់ទំនងសំខាន់របស់ខ្លួន ខណៈកំពុងប្រឈមមុខនឹងដៃគូប្រកួតប្រជែងជាច្រើន៕