បុគ្គលិកយោធាសហរដ្ឋអាមេរិក បានពង្រឹងរបងការពាលួសបន្លារ នៅតាមបណ្តោយព្រំដែនជាមួយ ទីក្រុង Ciudad Juarez ប្រទេសម៉ិកស៊ិក កាលពីថ្ងៃច័ន្ទ ទី៥ ខែឧសភា ខណៈប្រធានាធិបតីម៉ិកស៊ិក លោកស្រី Claudia Sheinbaum បានអះអាងជាថ្មីពីការច្រានចោលរបស់លោកស្រី ចំពោះការបញ្ជារបស់លោកប្រធានាធិបតីអាមេរិក Donald Trump ក្នុងការបញ្ជូនទាហានអាមេរិកដើម្បីប្រយុទ្ធប្រឆាំងការជួញដូរគ្រឿងញៀន។

ការអត្ថាធិប្បាយរបស់ លោកស្រី Sheinbaum គឺឆ្លើយតបទៅនឹងសំណួរអំពីសេចក្តីរាយការណ៍របស់ Wall Street Journal នាពេលថ្មីៗនេះ ដែលបាននិយាយថា លោក Trump កំពុងដាក់សម្ពាធលើប្រទេសម៉ិកស៊ិក ដើម្បីអនុញ្ញាតឱ្យមានការចូលរួមកាន់តែជ្រៅរបស់យោធាអាមេរិកប្រឆាំងក្រុមជួញដូរគ្រឿងញៀនឆ្លងព្រំដែនរួម។

លោក Trump បាននិយាយជាសាធារណៈថា សហរដ្ឋអាមេរិក នឹងចាត់វិធានការយោធាជាឯកតោភាគី ប្រសិនបើប្រទេសម៉ិកស៊ិក មិនបំបែកក្រុមជួញដូរគ្រឿងញៀន។ មេដឹកនាំទាំងពីរ បានសន្ទនាគ្នាជាច្រើនដង ក្នុងប៉ុន្មានខែថ្មីៗនេះ ដើម្បីពិភាក្សាអំពីបញ្ហាសន្តិសុខ ពាណិជ្ជកម្ម និងបញ្ហាអន្តោប្រវេសន៍។