តុលាការយុត្តិធម៌អន្តរជាតិ (ICJ) កាលពីថ្ងៃចន្ទ ទី៥ ខែឧសភា បានច្រានចោលសំណុំរឿងរបស់ប្រទេសស៊ូដង់ ដែលចោទប្រកាន់ប្រទេសអារ៉ាប់រួម ពីបទបញ្ឆេះអំពើប្រល័យពូជសាសន៍នៅទីក្រុង Darfur ដោយការផ្គត់ផ្គង់សព្វាវុធដល់កងកម្លាំងប្រដាប់អាវុធ។

ប្រទេសស៊ូដង់ បានជជែកតវ៉ានៅចំពោះមុខតុលាការជាន់ខ្ពស់របស់អង្គការសហប្រជាជាតិកាលពីខែមុនថា ប្រទេសអារ៉ាប់ រួមកំពុងរំលោភលើអនុសញ្ញាប្រល័យពូជសាសន៍ដោយគាំទ្រកងកម្លាំងយោធាប៉ារ៉ាក្នុងទីក្រុង Darfur ប៉ុន្តែប្រទទេសអារ៉ាប់រួម បាននិយាយថាករណីនេះគួរតែត្រូវបានលុបចោល។

តុលាការ កាលពីថ្ងៃចន្ទ បានយល់ស្របចំពោះការអះអាងរបស់ប្រទេសអារ៉ាប់រួម ដោយបានច្រានចោលសំណើរបស់ប្រទេសស៊ូដង់សម្រាប់វិធានការបន្ទាន់ និងបានបង្គាប់ឱ្យដកករណីនេះចេញពីសំណុំឯកសារបណ្តឹងរបស់ខ្លួន។

ប្រទេសស៊ូដង់ បានចោទប្រកាន់ប្រទេសអារ៉ាប់រួម(UAE) ថាបានផ្តល់អាវុធដល់កងកម្លាំងគាំទ្ររហ័ស (RSF) ដែលបាននិងកំពុងប្រយុទ្ធជាមួយកងទ័ពស៊ូដង់នៅក្នុងសង្គ្រាមស៊ីវិលរយៈពេលពីរឆ្នាំមកនេះ។ ប្រទេសអារ៉ាប់រួម ច្រានចោលការចោទប្រកាន់នេះ ប៉ុន្តែអ្នកជំនាញមួយចំនួនរបស់អង្គការសហប្រជាជាតិ និងសមាជិកសភាអាមេរិក បានរកឃើញថាវាគួរឱ្យទុកចិត្តបាន។ តុលាការយុត្តិធម៌អន្តរជាតិ(ICJ) គឺជាតុលាការជាន់ខ្ពស់របស់អង្គការសហប្រជាជាតិ ដែលដោះស្រាយជម្លោះរវាងរដ្ឋ និងការរំលោភលើសន្ធិសញ្ញាអន្តរជាតិ។