រដ្ឋមន្ត្រីការបរទេសអ៊ីរ៉ង់ លោក Abbas Araghchi កាលពីថ្ងៃចន្ទ (ទី៥ ខែឧសភា) បានចោទប្រកាន់នាយករដ្ឋមន្ត្រីអ៊ីស្រាអែល លោក Benjamin Netanyahu ថា បានប្រឹងប្រែងអូសទាញសហរដ្ឋអាមេរិកឲ្យធ្លាក់ចូលទៅក្នុង «មហន្តរាយ» នៅតំបន់មជ្ឈិមបូព៌ា ដោយព្រមានកុំមានការប៉ុនប៉ងណាមួយវាយប្រហារអ៊ីរ៉ង់ឲ្យសោះ។

អមដោយការព្រមានកុំបង្កើត «កំហុសណាមួយលើអ៊ីរ៉ង់» ឲ្យសោះ លោក Araghchi បានសរសេរនៅលើបណ្ដាញសង្គម X ថា៖ «លោក Netanyahu កំពុងជ្រៀតជ្រែកដោយផ្ទាល់នៅក្នុងរដ្ឋាភិបាលសហរដ្ឋអាមេរិក ដើម្បីអូសទាញរដ្ឋបាលនេះឲ្យធ្លាក់ចូលទៅក្នុងមហន្តរាយមួយផ្សេងទៀត នៅក្នុងតំបន់របស់យើង»។

ជាមួយគ្នានេះ លោក Araghchi ក៏បានចោទលោក Netanyahu ផងដែរថា បាន «ប៉ុនប៉ងបញ្ជាដោយបើកចំហនូវអ្វីដែលប្រធានាធិបតី លោក (Donald) Trump អាចធ្វើ និងមិនអាចធ្វើ នៅក្នុងទំនាក់ទំនងការទូតរបស់លោកជាមួយអ៊ីរ៉ង់»។

អ្នកការទូតជាន់ខ្ពស់របស់អ៊ីរ៉ង់រូបនេះ បានលើកឡើងពីការគាំទ្ររបស់សហរដ្ឋអាមេរិក ចំពោះអ៊ីស្រាអែល សម្រាប់សង្គ្រាម នៅតំបន់ហ្កាហ្សា ប្រឆាំងនឹងក្រុមសកម្មប្រយុទ្ធហាម៉ាសប៉ាឡេស្ទីន។ ការលើកឡើងនោះក៏សំដៅផងដែរទៅលើការវាយប្រហារសងសឹករបស់សហរដ្ឋអាមេរិក ចំពោះក្រុមឧទ្ទាមហ៊ួទីដែលគាំទ្រដោយទីក្រុងតេអេរ៉ង់ នៅក្នុងប្រទេសយេម៉ែន ដែលបាននិងកំពុងដាក់គោលដៅវាយប្រហារលើការដឹកជញ្ជូនទំនិញរបស់អ៊ីស្រាអែល និងសមុទ្រក្រហម ពេញមួយសង្រ្គាម នៅតំបន់ហ្កាហ្សានេះ។

លោកបានសង្កត់ធ្ងន់ថា «ការគាំទ្រដ៏គ្រោះថ្នាក់ ដើម្បីឲ្យលោក Netanyahu ប្រព្រឹត្តអំពើប្រល័យពួជសាសន៍ នៅតំបន់ហ្កាហ្សា និងការធ្វើសង្រ្គាម តំណាងឲ្យលោក Netanyahu ក្នុងប្រទេសយេម៉ែន មិនបានផ្ដល់ផលចំណេញអ្វីដល់ប្រជាជនអាមេរិកឡើយ»។

គួរបញ្ជាក់ថា កាលពីថ្ងៃទី៤ ខែឧសភា លោក Netanyahu បានទម្លាក់ការទទួលខុសត្រូវទៅលើអ៊ីរ៉ង់ និងបានប្តេជ្ញាសងសឹក បន្ទាប់ពីក្រុមហ៊ួទី បានបាញ់មីស៊ីលត្រូវចំតំបន់អាកាសយានដ្ឋានអន្តរជាតិ Ben Gurion របស់អ៊ីស្រាអែល។ អ៊ីរ៉ង់បានបដិសេធថា ខ្លួនមិនមានពាក់ព័ន្ធនឹងការវាយប្រហារនេះទេ៕