អ្នកនាំពាក្យសេតវិមាន លោក Kush Desai កាលពីថ្ងៃចន្ទ (ទី៥ ខែឧសភា) បាននិយាយថា រដ្ឋបាលរបស់ប្រធានាធិបតីអាមេរិក លោក Donald Trump មិនទាន់ធ្វើការសម្រេចចុងក្រោយណាមួយនៅឡើយទេ ពាក់ព័ន្ធនឹងពន្ធលើវិស័យភាពយន្តបរទេស ប៉ុន្តែកំពុងស្វែងរកជម្រើសទាំងអស់ ដើម្បីអនុវត្តតាមការណែនាំរបស់ប្រធានាធិបតី ទាក់ទងនឹងផលិតកម្មហូលីវូដ។

កាលពីថ្ងៃអាទិត្យចុងសប្ដាហ៍កន្លងមក លោក Trump បានប្រកាសអត្រាពន្ធ ១០០លើភាពយន្ត ដែលផលិតនៅក្រៅប្រទេស ដោយនិយាយថា ឧស្សាហកម្មភាពយន្តអាមេរិក កំពុង «ធ្លាក់ចុះយ៉ាងឆាប់រហ័ស» ដោយសារតែការលើកទឹកចិត្តដែលប្រទេសផ្សេងទៀតផ្តល់ជូន ដើម្បីទាក់ទាញអ្នកផលិតភាពយន្ត។

មន្ត្រីសេតវិមានបានកត់សម្គាល់ថា ការផលិតភាពយន្តហូលីវូដ បានធ្លាក់ចុះយ៉ាងខ្លាំងនៅក្នុងត្រីមាសទី១ នៃឆ្នាំ២០២៥ ដោយមានការថតត្រឹមតែ ៤៥១ថ្ងៃប៉ុណ្ណោះ សម្រាប់ខ្សែភាពយន្តខ្នាតវែង នៅក្នុងតំបន់ ដោយធ្លាក់ចុះជិត ៣០ភាគរយ ធៀបនឹងឆ្នាំមុន។

តាមរយៈការបង្ហោះ នៅលើបណ្ដាញសង្គម Truth Social របស់លោក ដែលប្រកាសពីពន្ធថ្មីនោះ លោក Trump បានប្រាប់ថា លោកកំពុងផ្តល់សិទ្ធិឲ្យទីភ្នាក់ងាររដ្ឋាភិបាលពាក់ព័ន្ធ ដូចជាក្រសួងពាណិជ្ជកម្ម ដើម្បីចាប់ផ្តើមដំណើរការនូវការដំឡើងពន្ធ ១០០ភាគរយជាបន្ទាន់ លើខ្សែភាពយន្តទាំងអស់ផលិតនៅបរទេស ដែលបន្ទាប់មកត្រូវបានបញ្ជូនមកកាន់សហរដ្ឋអាមេរិក។

យ៉ាងណាក្ដី សេតវិមានមិនបានចេញផ្សាយព័ត៌មានលម្អិត អំពីមូលដ្ឋានច្បាប់ សម្រាប់វិធានការនេះ ឬថា តើវានឹងត្រូវបានអនុវត្តដោយរបៀបណា ដែលទុកឲ្យមនុស្សជាច្រើននៅក្នុងឧស្សាហកម្មភាពយន្តមានភាពរំជើបរំជួល៕