រដ្ឋមន្ត្រីការពារជាតិសហរដ្ឋអាមេរិក លោក Pete Hegseth បានបញ្ជាឱ្យមន្ទីរបញ្ចកោណ កាត់បន្ថយចំនួនឧត្តមសេនីយ៍ផ្កាយបួន យ៉ាងហោចណាស់២០ភាគរយ ដើម្បីធ្វើឲ្យមានសមត្ថភាពកាន់តែខ្លាំងដល់ការដឹកនាំយោធា។

លោក Hegseth បាននិយាយនៅក្នុងវីដេអូមួយដែលបានបង្ហោះនៅលើបណ្តាញផ្សព្វផ្សាយសង្គមកាលពីថ្ងៃចន្ទថា «នេះពុំមែនជាការកាត់មនុស្សច្រើនចេញពីប្រព័ន្ធការងារ ដែលមានន័យថាដាក់ទណ្ឌកម្មលើមន្ត្រីជាន់ខ្ពស់នោះទេ»។ លោកបាននិយាយថា គោលបំណងគឺដើម្បីបង្កើន «ការត្រៀមខ្លួនជាយុទ្ធសាស្ត្រ និងប្រសិទ្ធភាពក្នុងប្រតិបត្តិការ។

លោក Hegseth និយាយថា យោធាអាមេរិក បច្ចុប្បន្នមានឧត្តមសេនីយ៍ផ្កាយបួនចំនួន៤៤នាក់ ឬសមមូលនឹងចំនួននេះ។ ការកាត់បន្ថយនេះ នឹងត្រូវធ្វើឡើងដោយប្រុងប្រយ័ត្ន ប៉ុន្តែធ្វើ«ដោយរួសរាន់»។ ប្រព័ន្ធផ្សព្វផ្សាយអាមេរិករាយការណ៍ថា ជម្រើសដែលត្រូវបានសិក្សារួមមានការបញ្ចូលគ្នានូវទីបញ្ជាការយោធាដែលត្រួតពិនិត្យនៅទ្វីបអាហ្វ្រិក និងអឺរ៉ុប។

ចំណាត់ការនេះ ធ្វើឡើងក្នុងពេលដែលមានការជំរុញយ៉ាងទូលំទូលាយដើម្បីកាត់បន្ថយការចំណាយរបស់សហព័ន្ធដោយក្រសួងប្រសិទ្ធភាពរដ្ឋាភិបាលដែលគេស្គាល់ថាជា DOGE ។