ប្រទេសប៉ាគីស្ថាន នៅថ្ងៃអង្គារ (ទី៦ ខែឧសភា) នេះ បានចោទប្រកាន់ប្រទេសឥណ្ឌាថា បានធ្វើឲ្យមានភាពប្រែប្រួលដល់លំហូររបស់ទន្លេ Chenab ជាទន្លេមួយក្នុងចំណោមទន្លេចំនួន ៣ ដែលស្ថិតនៅក្រោមការគ្រប់គ្រងរបស់ប៉ាគីស្ថាន ក្រោមសន្ធិសញ្ញាទឹក Indus Waters Treaty ដែលពេលនេះត្រូវបានផ្អាក។

ទន្លេដ៏សំខាន់នេះមានប្រភពនៅឥណ្ឌា ប៉ុន្តែត្រូវបានបែងចែកទៅឲ្យប៉ាគីស្ថាន ក្រោមសន្ធិសញ្ញាទឹក Indus Waters Treaty ឆ្នាំ១៩៦០ ដែលចុះហត្ថលេខាដោយមហាអំណាចនុយក្លេអ៊ែរទាំង២។ ឥណ្ឌាបានផ្អាកសន្ធិសញ្ញានេះ បន្ទាប់ពីការវាយប្រហារដ៏អាក្រក់បំផុត នៅតំបន់កាស្មៀរគ្រប់គ្រងដោយឥណ្ឌា កាលពីថ្ងៃទី២២ ខែមេសា បានសម្លាប់មនុស្ស ២៦នាក់។

ទីក្រុងអ៊ីស្លាម៉ាបាដ បានព្រមានថា ការរំខានដល់ទន្លេរបស់ខ្លួន នឹងត្រូវបានចាត់ទុកថា ជា «សកម្មភាពបង្កសង្រ្គាម»។ លោក Kazim Pirzada រដ្ឋមន្ត្រីក្រសួងធារាសាស្ត្រខេត្ត Punjab បានប្រាប់សារប័ត៌មាន AFP ថា៖ «យើងបានឃើញការប្រែប្រួលនៅក្នុងទន្លេ (Chenab) ដែលមិនមែនកើតឡើងដោយធម្មជាតិនោះឡើយ»។

លោក Pirzada បានព្រមានថា ខេត្ត Punjab ដែលមានព្រំប្រទល់ជាប់ឥណ្ឌា និងមានប្រជាជនជិតពាក់កណ្តាលនៃប្រជាជនប៉ាគីស្ថានចំនួន ២៤០លាននាក់ គឺជាតំបន់កសិកម្មរបស់ប្រទេស ហើយ «ផលប៉ះពាល់ភាគច្រើន នឹងកើតមាននៅក្នុងតំបន់ដែលមានផ្លូវទឹកជំនួសតិចតួច»។ លោក Pirzada បានបន្ថែមថា «មួយថ្ងៃ ទឹកទន្លេមានលំហូរធម្មតា ហើយមួយថ្ងៃទៀត វាមានការថយចុះយ៉ាងខ្លាំង»។

នៅតំបន់កាស្មៀរគ្រប់គ្រងដោយប៉ាគីស្ថាន បរិមាណទឹកដ៏ច្រើនពីឥណ្ឌា ត្រូវបានគេរាយការណ៍ថា ត្រូវបានបញ្ចេញកាលពីថ្ងៃទី២៦ ខែមេសា។ នេះបើយោងតាមវិទ្យាស្ថាន Jinnah ជាវិទ្យាស្ថានស្រាវជ្រាវដែលដឹកនាំដោយអតីតរដ្ឋមន្ត្រីទទួលបន្ទុកបម្រែបម្រួលអាកាសធាតុប៉ាគីស្ថាន៕