រដ្ឋមន្ត្រីប្រចាំខេត្តរបស់ខេត្ត Punjab ប្រទេសប៉ាគីស្ថាន លោកស្រី Maryam Nawaz នៅថ្ងៃពុធសប្ដាហ៍នេះ បានប្រកាសដាក់ខេត្តក្នុងគ្រាអាសន្ននៅទូទាំងខេត្ត និងបានបញ្ជាឱ្យបិទស្ថាប័នអប់រំទាំងអស់ បន្ទាប់ពីការវាយប្រហារដោយមីស៊ីលរបស់ឥណ្ឌាជាបន្តបន្ទាប់ ដែលបានកំណត់គោលដៅលើតំបន់ជនស៊ីវិល ដោយរុញឱ្យមានការឆ្លើយតបខាងយោធាភ្លាមៗពីប្រទេសប៉ាគីស្ថាន។

លោកស្រី Maryam បានប្រកាសនៅក្នុងសន្និសីទបន្ទាន់មួយ ដោយជំរុញឱ្យមន្ទីរពេទ្យ និងសេវាជួយសង្គ្រោះបន្តប្រុងប្រយ័ត្នខ្ពស់ថា រាល់ការសុំច្បាប់របស់វេជ្ជបណ្ឌិត និងបុគ្គលិកពេទ្យទាំងអស់ត្រូវបានលុបចោល ហើយបុគ្គលិកការពារជនស៊ីវិលត្រូវបានកោះហៅមកបំពេញកាតព្វកិច្ច។

ការប្រកាសនេះបានធ្វើឡើងបន្ទាប់ពីយោធាប៉ាគីស្ថានបានបញ្ជាក់ថា កងកម្លាំងឥណ្ឌា បានបើកការវាយប្រហារតាមអាកាសទៅលើទីតាំងចំនួនប្រាំក្នុងប្រទេសប៉ាគីស្ថាន រួមមានតំបន់ Bahawalpur, Kotli, Muzaffarabad, Bagh និងតំបន់ Muridke។

យោងតាមអគ្គនាយកនៃទំនាក់ទំនងសាធារណៈអន្តរសេវាកម្ម(DG ISPR) លោកឧត្តមសេនីយ Ahmed Sharif Chaudhry បានឲ្យដឹងថា ការវាយប្រហារបានផ្តោតលើតំបន់ជនស៊ីវិល។

ប្រភពសន្តិសុខបានបញ្ជាក់ថា នៅក្នុងការវាយបកយ៉ាងឆាប់រហ័ស កងកម្លាំងប្រដាប់អាវុធរបស់ប៉ាគីស្ថានបានបើកការវាយប្រហារដោយមីស៊ីល ដែលត្រូវបានគេរាយការណ៍ថាបានបំផ្លាញទីស្នាក់ការកងពលតូចឥណ្ឌា និងប៉ុស្តិ៍យោធានៅក្នុងតំបន់ Dudhnial តាមបណ្តោយបន្ទាត់នៃការគ្រប់គ្រង (LoC) ។កងកម្លាំងអាកាសប៉ាគីស្ថាន ក៏បានបាញ់ទម្លាក់យន្តហោះឥណ្ឌា៥គ្រឿងដែរ៕