ឥណ្ឌា បើកការវាយប្រហារលើទីតាំងជាច្រើននៅប៉ាគីស្ថាន នាថ្ងៃពុធ (០៧ ឧសភា) នេះ ឆ្លើយតបទៅនឹងការសម្លាប់មនុស្ស ២៦នាក់នៅតំបន់កាស្មៀរ ដែលខ្លួនគ្រប់គ្រង ហើយទីក្រុងអ៊ីស្លាម៉ាបាដ ក៏បានប្ដេជ្ញាសងសឹក នៅក្នុងសកម្មភាពបង្កើនភាពតានតឹងចុងក្រោយបំផុតរវាងអ្នកជិតខាងទាំងពីរ បន្ថែមពីលើបញ្ជីដ៏វែងនៃប្រវត្តិជម្លោះយោធារវាងរដ្ឋមានអាវុធនុយក្លេអ៊ែរទាំងពីរ។

សង្គ្រាមលើកដំបូង រវាងប្រទេសទាំងពីរគឺនៅឆ្នាំ១៩៤៧ ទាក់ទងនឹងតំបន់កាស្មៀរ។ ប្រទេសឥណ្ឌា ដែលមានជនជាតិហិណ្ឌូភាគច្រើន និងប៉ាគីស្ថាន ដែលភាគច្រើនជាជនជាតិមូស្លីម ត្រូវបានបង្កើតឡើងនៅខែសីហា ឆ្នាំ១៩៤៧ បន្ទាប់ពីចក្រភពអង់គ្លេស ប្រគល់អាណានិគមគ្រប់គ្រងនៃឧបទ្វីបនេះ ហើយប៉ុន្មានខែក្រោយមក ប្រទេសថ្មីទាំងពីរធ្វើសង្រ្គាមដណ្ដើមគ្រប់គ្រងទឹកដីតំបន់ភ្នំហិម៉ាឡៃ កាស្មៀរ។

ក្រោយមកគឺសង្គ្រាមកាស្មៀរលើកទីពីរក្នុងឆ្នាំ១៩៦៥ ដោយភាគីទាំងពីរនៅតែដណ្ដើមការគ្រប់គ្រងលើតំបន់កាស្មៀរ ហើយកងកម្លាំងប៉ាគីស្ថាន បានឆ្លងចូលទៅក្នុងផ្នែករបស់ឥណ្ឌា នៃតំបន់ជម្លោះនេះ ជាការឆ្លើយតបទៅនឹងការដែលឥណ្ឌា បានបើកការលុកលុយយោធាឆ្លងកាត់ព្រំដែន។

ឆ្នាំ១៩៧១ គឺសង្គ្រាមនៅប៉ាគីស្ថានខាងកើត។ ប្រទេសជិតខាងទាំងពីរបានធ្វើសង្គ្រាមលើកទីបីរបស់ពួកគេលើស្លាបខាងកើតរបស់ប៉ាគីស្ថាន ជាទីដែលក្រុមក្នុងតំបន់កំពុងស្វែងរកឯករាជ្យភាពពីរដ្ឋាភិបាលសហព័ន្ធ។ ឆ្នាំ១៩៩៩ គឺសង្រ្គាម KarGIL ដែលមើលឃើញប្រទេសទាំងពីរប្រឈមមុខដាក់គ្នានៅតំបន់ខ្ពង់រាប Kargil បន្ទាប់ពីកងទ័ពប៉ាគីស្ថាន ជ្រៀតចូលតំបន់កាស្មៀរ ដែលគ្រប់គ្រងដោយឥណ្ឌា។

ឆ្នាំ ២០១៦ មើលឃើញការវាយប្រហារ URI ដោយឥណ្ឌានិយាយថា ខ្លួនបានធ្វើ "ការវាយប្រហារយ៉ាងរហ័ស" លើឧបករណ៍បាញ់មីស៊ីលរបស់ពួកសកម្មប្រយុទ្ធអ៊ិស្លាមនិយមក្នុងទឹកដីប៉ាគីស្ថាន បន្ទាប់ពីខ្មាន់កាំភ្លើងបានវាយលុកមូលដ្ឋានយោធាឥណ្ឌា ក្នុងតំបន់ Uri នៃកាស្មៀរ។

នៅឆ្នាំ២០១៩ ជាការវាយប្រហារ PULWAMA ដោយពេលនោះ ឥណ្ឌាបានវាយតាមអាកាសលើអ្វីដែលខ្លួននិយាយថាជាជំរំហ្វឹកហាត់របស់ពួកសកម្មប្រយុទ្ធនៅជិតក្រុង Balakot របស់ប៉ាគីស្ថាន ជាការឆ្លើយតបទៅនឹងការបំផ្ទុះគ្រាប់បែកអត្តឃាតនៅតំបន់ Pulwama នៃកាស្មៀរ។ ចុងក្រោយបំផុតគឺជម្លោះនៅឆ្នាំ២០២៥នេះ នៅពេលដែលឥណ្ឌាបើកការវាយប្រហារលើទីតាំងជាច្រើននៅប៉ាគីស្ថានក្នុងថ្ងៃពុធសប្ដាហ៍នេះ៕