មេបញ្ជាការកងទ័ពប្រទេសស៊ូដង់ លោក Abdul Fattah al-Burhan បានប្តេជ្ញាសងសឹកក្រោយការផ្ទុះនិងការបាញ់ផ្លោងធ្វើឲ្យកក្រើករដ្ឋធានីកំពង់ផែ Port Sudan កាលពីថ្ងៃអង្គារ ៦ ខែឧសភា។

មេបញ្ជាការកងទ័ពបាននិយាយនៅក្នុងសុន្ទរកថាមួយតាមទូរទស្សន៍នៅពីមុខបង្គោលដ៏ធំមួយ មានផ្សែងហុយចេញពីកំពង់ផែទីក្រុង ក្រោយការវាយប្រហារដោយយានដ្រូនរយៈពេលប៉ុន្មានថ្ងៃកន្លងទៅនេះធ្វើឡើងដោយកងកម្លាំងគាំទ្ររហ័ស(RSF) ។

ក្រុមហ៊ុនសន្តិសុខដែនសមុទ្ររបស់អង់គ្លេស Ambrey បានរាយការណ៍ថា ការវាយប្រហាររួមមានការវាយប្រហារដោយយានដ្រូនពីសំណាក់កងកម្លាំង RSF ដែលកំណត់គោលដៅលើចំណតទូរទំនិញនៅកំពង់ផែស៊ូដង់។

ការវាយប្រហារនេះ ជាការវាយប្រហារខ្លាំងបំផុតចាប់តាំងពីការវាយប្រហារនៅកំពង់ផែស៊ូដង់បានចាប់ផ្តើមកាលពីថ្ងៃអាទិត្យ ជាការកើនឡើងយ៉ាងខ្លាំងក្នុងជម្លោះដែលមានរយៈពេលពីរឆ្នាំមកនេះ។ យានដ្រូន បានដើរតួនាទីកើនឡើងក្នុងការប្រយុទ្ធ និងជួយដល់ការរុលចូលរបស់កងទ័ព នៅដើមឆ្នាំនេះ។