ប្រព័ន្ធផ្សព្វផ្សាយរដ្ឋ KCNA បាននិយាយនៅថ្ងៃពុធ (០៧ ឧសភា) នេះថា មេដឹកនាំកូរ៉េខាងជើង លោក Kim Jong Un បានចុះទៅទស្សនកិច្ចត្រួតពិនិត្យរោងចក្រផលិតគ្រាប់រំសេវ និងគ្រឿងចក្រ។

KCNA រាយការណ៍ថា អំឡុងពេលនោះ លោក Kim បានលើកសរសើររោងចក្រនេះសម្រាប់ការបង្កើនល្បឿនដ៏លឿននៃផលិតកម្មគ្រប់ផ្លោងដល់តួលេខ ៤ដងនៃ "កម្រិតមធ្យមក្នុងមួយឆ្នាំ" និងដើរតួសំខាន់ក្នុងការបង្កើនថាមពលប្រយុទ្ធជាមូលដ្ឋាននៃកងកម្លាំងប្រដាប់អាវុធរបស់កូរ៉េខាងជើង។

សមាជិកសភាកូរ៉េខាងត្បូង បាននិយាយកាលពីសប្តាហ៍មុនដោយដកស្រង់សំដីភ្នាក់ងារចារកម្មរបស់ប្រទេសនេះថា ប្រទេសកូរ៉េខាងជើង បានផ្តល់ "មីស៊ីល និងគ្រាប់ផ្លោងមានតម្លៃរាប់ពាន់លានដុល្លារ" ដល់ប្រទេសរុស្ស៊ី ក្នុងប្រតិបត្តិការយោធាប្រឆាំងនឹងអ៊ុយក្រែន ព្រមទាំងការដាក់ពង្រាយទាហានប្រហែល ១៥.០០០នាក់ផងដែរ។

ប្រការនេះបានផ្តល់ឱ្យរុស្ស៊ី នូវអត្ថប្រយោជន៍ខ្លាំងក្នុងសមរភូមិនៅជួរមុខនានា ជាពិសេសតំបន់ Kursk ភាគខាងលិចរបស់ខ្លួន ហើយបាននាំឱ្យប្រទេសទាំងពីរដែលឯកោខាងសេដ្ឋកិច្ច និងនយោបាយទាំងពីរនេះ កាន់តែខិតជិតគ្នាខ្លាំងឡើង ក្នុងកម្រិតមួយដែលធ្វើឱ្យអ្នកជំនាញ និងប្រទេសជាច្រើនព្រួយបារម្ភ៕