អ៊ុយក្រែន កាលពីថ្ងៃអង្គារ (០៦ ឧសភា) បានអំពាវនាវឱ្យបណ្ដាប្រទេសនានា បដិសេធមិនចូលរួមក្នុងការប្រារព្ធទិវាជ័យជម្នះនាពេលខាងមុខនៅក្នុងប្រទេសរុស្ស៊ី។

ក្រសួងការបរទេសអ៊ុយក្រែន និយាយនៅក្នុងសេចក្តីថ្លែងការណ៍មួយថា កងទ័ពរុស្ស៊ី បច្ចុប្បន្នកំពុងប្រព្រឹត្ត "អំពើឃោរឃៅនៅអ៊ុយក្រែន ក្នុងកម្រិតមួយដែលអឺរ៉ុប មិនបានឃើញចាប់តាំងពីសង្គ្រាមលោកលើកទីពីរមក"។

ក្រសួងបន្តថា "កងទ័ពទាំងនោះហើយដែលនឹងដើរក្បួននៅទីលានចតុរង្គក្រហម ក្នុងទីក្រុងមូស្គូ នៅថ្ងៃទី០៩ ខែឧសភា" ដោយចោទប្រកាន់រុស្ស៊ី ពីការអញ្ជើញបុគ្គលិកយោធាបរទេសឱ្យចូលរួមក្នុងក្បួនដង្ហែរនៅថ្ងៃទី០៩ ខែឧសភា ដើម្បីបង្ហាញពីភាពត្រឹមត្រូវនៃ "សកម្មភាពយោធា" របស់ខ្លួន និងកំណត់ការចូលរួមបែបនេះថា "មិនអាចទទួលយកបានឡើយ"។

ទីក្រុងគីវ បានអំពាវនាវដល់បរទេសឱ្យបដិសេធការចូលរួមរបស់បុគ្គលិកយោធារបស់ពួកគេនៅក្នុងក្បួនដង្ហែទីក្រុងមូស្គូ ជាពិសេសរដ្ឋដែលមានជំហរអព្យាក្រឹតទាំងក្នុងនយោបាយអន្តរជាតិ ឬលើសង្រ្គាមអ៊ុយក្រែន ដែលឥឡូវនេះនៅក្នុងឆ្នាំទីបួនរបស់ខ្លួន។

គួរឱ្យដឹងថា នៅថ្ងៃទី០៩ ខែឧសភា ខាងមុខនេះ ក្បួនព្យុហយាត្រាយោធាប្រចាំឆ្នាំនឹងប្រព្រឹត្តទៅនៅទីលានក្រហម របស់ទីក្រុងមូស្គូ ដោយមានការចូលរួមពីមេដឹកនាំបរទេសជាច្រើនរូប ក្នុងពិធីរំលឹកខួបលើកទី៨០ នៃជ័យជម្នះរបស់សហភាពសូវៀត លើពួកណាហ្ស៊ីអាល្លឺម៉ង់ ក្នុងសង្គ្រាមលោកលើកទីពីរ៕