អង្គការសហប្រជាជាតិ បានព្រមានជាថ្មីម្ដងទៀតកាលពីថ្ងៃអង្គារ (០៦ ឧសភា) ថា ប្រតិបត្តិការមនុស្សធម៌នៅតំបន់ហ្កាហ្សាស្ទ្រីប ដែលហែកហួរដោយសង្រ្គាមដ៏បង្ហូរឈាម កំពុងស្ថិតក្នុងដំណាក់កាល "ជិតដួលរលំទាំងស្រុង" ដោយសារតែការបន្តបិទផ្លូវរបស់អ៊ីស្រាអែល និងការបដិសេធមិនឱ្យប្រេងឥន្ធនៈ និងការផ្គត់ផ្គង់ផ្សេងទៀតចូលទៅដែនដីដ៏តូចចង្អៀតនោះ។

អ្នកនាំពាក្យអង្គការសហប្រជាជាតិ លោក Farhan Haq បាននិយាយនៅក្នុងសន្និសីទសារព័ត៌មាន ដោយដកស្រង់ពីការិយាល័យសម្របសម្រួលកិច្ចការមនុស្សធម៌ (OCHA) ថា "អាជ្ញាធរអ៊ីស្រាអែល បន្តបដិសេធជាប្រចាំនូវការចូលទៅកាន់កន្លែងស្តុកប្រេង នៅក្នុងទីតាំងផ្សេងៗដូចជាក្រុងរ៉ាហ្វាជាដើម"។ លោកបន្តថា "ខណៈនេះ ពេលវេលាជិតអស់ហើយ សម្រាប់ប្រតិបត្តិការជំនួយនៅហ្កាហ្សា"។

អន្តរជាតិ និងទីភ្នាក់ងារជំនួយ បានទាមទារឱ្យមានការដកជាបន្ទាន់នូវការបិទផ្លូវរបស់អ៊ីស្រាអែល នៅលើតំបន់ហ្កាហ្សានេះដែលចូលដល់ខែទី៣ហើយ ដោយព្រមានថាភាពអត់ឃ្លាន និងជំងឺកំពុងបំផ្លាញប្រជាជនភៀសខ្លួន។

កម្មវិធីស្បៀងអាហារពិភពលោក (WFP) កាលពីចុងខែមេសា និយាយថា ខ្លួនបានអស់ស្តុកស្បៀងអាហារហើយនៅក្នុងហ្កាហ្សា ដោយសារតែការបិទផ្លូវរបស់អ៊ីស្រាអែលលើការផ្គត់ផ្គង់ទាំងអស់ចាប់តាំងពីថ្ងៃទី០២ ខែមីនាមក។ អ៊ីស្រាអែលនិយាយថា ការទម្លាក់គ្រាប់បែកជាថ្មីរបស់ខ្លួន និងការបិទផ្លូវជំនួយតំបន់ហ្កាហ្សា មានបំណងបង្ខំក្រុមហាម៉ាស ឱ្យដោះលែងចំណាប់ថ្នូរដែលនៅសេសសល់៕