ប្រទេសចិន នៅថ្ងៃពុធ (ទី៧ ខែឧសភា) បានសម្តែងការសោកស្តាយ និងក្ដីបារម្ភ ចំពោះការវាយប្រហាររបស់ប្រទេសឥណ្ឌាទៅលើប៉ាគីស្ថាន ដោយជំរុញឲ្យភាគីទាំង២ បង្ហាញការអត់ធ្មត់ ដែលនេះជាការឆ្លើយតបទៅនឹងការកើនឡើងនូវភាពតានតឹងយ៉ាងខ្លាំងក្លា រវាងប្រទេសជិតខាងប្រដាប់ដោយអាវុធនុយក្លេអ៊ែររបស់ខ្លួន។

គួរបញ្ជាក់ថា ឥណ្ឌា និងប៉ាគីស្ថានបានបាញ់កាំភ្លើងធំតគ្នាយ៉ាងខ្លាំងក្លា នៅតាមបណ្តោយព្រំដែនដែលមានជម្លោះរបស់ពួកគេ នៅថ្ងៃទី៧ ខែឧសភានេះ បន្ទាប់ពីទីក្រុងញូវដេលីបានបាញ់មីស៊ីលទៅលើគូប្រជែងដ៏ស្រួចស្រាល់របស់ខ្លួន។

ប៉ាគីស្ថានបានប្រាប់ថា ការវាយប្រហាររបស់ឥណ្ឌា បានបណ្ដាលឲ្យមនុស្សស្លាប់ និងរបួសរាប់សិបនាក់ ហើយឥណ្ឌាក៏បានឲ្យដឹងដែរថា ការបាញ់កាំភ្លើងធំរបស់ប៉ាគីស្ថាន បានសម្លាប់ជនស៊ីវិលយ៉ាងតិច ៣នាក់ នៅតាមបណ្តោយព្រំដែនជាក់ស្ដែង ក្នុងតំបន់មានជម្លោះកាស្មៀរ។

ចិនដែលមានព្រំដែនគោកជាមួយប្រទេសទាំង២ និងជាសម្ព័ន្ធមិត្តជិតស្និទ្ធរបស់ប៉ាគីស្ថាន បានលើកឡើងថា ខ្លួនបានសម្តែង «ការសោកស្តាយ ចំពោះវិធានការយោធារបស់ឥណ្ឌានៅព្រឹកនេះ» ហើយបាននិយាយថា ខ្លួនមាន «ការព្រួយបារម្ភ អំពីការវិវត្ត នាពេលនេះ»។

អ្នកនាំពាក្យក្រសួងការបរទេសបានឲ្យដឹងនៅក្នុងសេចក្តីថ្លែងការណ៍ថា៖ «ប្រទេសឥណ្ឌា និងប៉ាគីស្ថាន គឺជាអ្នកជិតខាងដែលផ្ដាច់ចេញពីគ្នាមិនបាន ហើយប្រទេសទាំង២ ក៏ជាអ្នកជិតខាងរបស់ចិនផងដែរ»។ សេចក្តីថ្លែងការណ៍បានសង្កត់ធ្ងន់ថា៖ «ប្រទេសចិនប្រឆាំងគ្រប់ទម្រង់នៃអំពើភេរវកម្ម»។

អ្នកនាំពាក្យរូបនេះបានបន្ថែមថា៖ «យើងអំពាវនាវឲ្យទាំងឥណ្ឌា និងប៉ាគីស្ថាន ផ្តល់អាទិភាពដល់សន្តិភាព និងស្ថិរភាព រក្សាភាពស្ងប់ស្ងាត់ និងទប់ស្កាត់ ហើយជៀសវាងការចាត់វិធានការដែលធ្វើឲ្យស្ថានការណ៍កាន់តែស្មុគស្មាញ»៕