ប្រធានាធិបតីអាមេរិក លោក Donald Trump បាននិយាយថា វាមិនមែនជាពេលវេលាល្អនោះឡើយ ក្នុងការអញ្ជើញរុស្សីឲ្យចូលរួម ក្នុងក្រុមប្រទេសសេដ្ឋកិច្ចធំៗទាំង៧ (G7) ដោយការលើកឡើងនេះកើតមានតែប៉ុន្មានខែប៉ុណ្ណោះ បន្ទាប់ពីរូបលោកបានព្រលយពាក្យថា លោកចង់ឃើញប្រទេសនេះក្លាយជាសមាជិករបស់ប្លុកនេះឡើងវិញ។

កាលពីថ្ងៃអង្គារ (ទី៦ ខែឧសភា) ក្នុងអំឡុងពេលកិច្ចប្រជុំនៃក្រុមការងារ World Cup របស់លោក លោក Trump បាននិយាយថា៖ «ខ្ញុំគិតថា វាមិនមែនជាពេលវេលាល្អនោះឡើយ។ យើងបានបាត់បង់ឱកាសនោះ ដោយសារការសម្រេចចិត្តមិនបានត្រឹមត្រូវមួយផ្សេងទៀតពីសំណាក់មនុស្សមួយចំនួន ដែលមិនគួរធ្វើការសម្រេចចិត្ត»។

ការអត្ថាធិប្បាយរបស់លោក Trump បានកើតឡើង ស្របពេលដែលកិច្ចប្រឹងប្រែងរបស់លោក ក្នុងការជួយសម្របសម្រួលឲ្យមានកិច្ចព្រមព្រៀងសន្តិភាពឲ្យបានឆាប់រហ័ស ដើម្បីបញ្ចប់សង្រ្គាមរបស់រុស្ស៊ី នៅអ៊ុយក្រែន បានដើរដល់ផ្លូវទាល់ ខណៈដែលលោកប្រធានាធិបតី Vladimir Putin បានទាមទារឲ្យធ្វើសម្បទានដែនដីយ៉ាងទូលំទូលាយ ជាផ្នែកនៃកិច្ចព្រមព្រៀងណាមួយ ដើម្បីបញ្ចប់ការលុកលុយ។

គួររំលឹកថា កាលពីថ្ងៃទី១៣ ខែកុម្ភៈ ប្រធានាធិបតីអាមេរិក បានលើកឡើងថា ទីក្រុងមូស្គូគួរតែត្រូវបានរួមបញ្ចូលទៅក្នុងក្រុម G7 ម្តងទៀត ដោយនិយាយថា ការដេកចេញនោះអាចរួមចំណែកដល់ការសម្រេចចិត្តរបស់លោក Putin ក្នុងការបើកការលុកលុយពេញបន្ទុកលើអ៊ុយក្រែន នៅឆ្នាំ២០២២។

រុស្ស៊ីត្រូវបានបញ្ចប់ភាពជាសមាជិករបស់ក្រុមនេះ ក្នុងឆ្នាំ២០១៤ បន្ទាប់ពីខ្លួនបានបញ្ចូលតំបន់គ្រីម៉េរបស់អ៊ុយក្រែនជាដែនដីឧបសម្ព័ន្ធ ដែលជាចំណាត់ការខុសច្បាប់ ក្រោមច្បាប់អន្តរជាតិ៕