ទីភ្នាក់ងារកុមាររបស់អង្គការសហប្រជាជាតិ គឺអង្គការយូនីសេហ្វ (UNICEF) បានឲ្យដឹងថា បម្រែបម្រួលអាកាសធាតុធ្វើឲ្យកង្វះអាហារូបត្ថម្ភកាន់តែអាក្រក់ទៅៗ នៅតំបន់អាស៊ី ដោយកុមារតូចៗរងផលប៉ះពាល់ខ្លាំងបំផុត ដោយសារប្រព័ន្ធសុខភាព និងអាហារ ផុយស្រួយខ្លាំងឡើងៗ។

កាលពីថ្ងៃអង្គារ (ទី៦ ខែឧសភា) ទីប្រឹក្សាផ្នែកអាហារូបត្ថម្ភប្រចាំតំបន់របស់អង្គការយូនីសេហ្វ សម្រាប់អាស៊ីបូព៌ា និងប៉ាស៊ីហ្វិក លោក Roland Kupka បានប្រាប់ប្រព័ន្ធផ្សព្វផ្សាយ CNA ថា ទោះបីជាមានការអភិវឌ្ឍយ៉ាងឆាប់រហ័សនៅក្នុងតំបន់ក៏ដោយ ក៏កុមារជាច្រើននៅតែមិនទទួលបានអាហារូបត្ថម្ភដែលពួកគេត្រូវការនោះឡើយ។

នៅក្រៅកម្មវិធី Ecosperity Week ដែលជាព្រឹត្តិការណ៍និរន្តរភាពប្រចាំឆ្នាំរៀបចំដោយក្រុមហ៊ុន Temasek លោក Kupka បាននិយាយថា៖ «បម្រែបម្រួលអាកាសធាតុកំពុងដាក់សម្ពាធលើប្រព័ន្ធសុខាភិបាល»។

លោកបានប្រាប់ទៀតថា៖ «ទន្ទឹមនឹងនោះ ការប្រែប្រួលអាកាសធាតុក៏កំពុងធ្វើឲ្យខូចដល់ប្រព័ន្ធអាហារផងដែរ។ ដូច្នេះ យើងឃើញការថយចុះនៃគុណភាព (និង) បរិមាណនៃអាហារ ហើយអ្វីដែលធ្វើឲ្យវាមានភាពច្បាស់ណាស់ថា វាពិបាកក្នុងការនិយាយអំពីវិធានការអាកាសធាតុដោយមិនយកកុមារ ក៏ដូចជាអាហារូបត្ថម្ភរបស់កុមារ ជាអាទិភាពនៃកិច្ចប្រឹងប្រែងទាំងនោះ»។

លោក Kupka បានសង្កត់ធ្ងន់ថា វិបត្តិអាហារូបត្ថម្ភ នៅអាស៊ី កំពុងក្លាយជារឿងបន្ទាន់ខ្លាំង ដែលកុមារប្រហែល ១៩លាននាក់ «ខ្វះអាហារូបត្ថម្ភរ៉ាំរ៉ៃ»។ ហើយលោក បានបញ្ជាក់ថា ការផ្តល់ហិរញ្ញប្បទាននៃកម្មវិធីជំនួយ គឺជាឧបសគ្គដ៏ធំបំផុតមួយ ក្នុងការដោះស្រាយបញ្ហាកង្វះអាហារូបត្ថម្ភនេះ៕