អ្នកចរចាជាន់ខ្ពស់់របស់ក្រុមនេះ លោក Mohammed Abdulsalam បានប្រាប់សារព័ត៌មានរ៉យទ័រនៅថ្ងៃពុធនេះថា កិច្ចព្រមព្រៀងបទឈប់បាញ់គ្នារវាងក្រុមហ៊ូទីរបស់យេម៉ែន និងសហរដ្ឋអាមេរិក មិនរាប់បញ្ចូលប្រតិបត្តិការប្រឆាំងនឹងអ៊ីស្រាអែល «តាមមធ្យោបាយ រូបរាង ឬទម្រង់ណាមួយឡើយ»។ 

សេចក្តីថ្លែងការណ៍របស់លោក Abdulsalam បានធ្វើឡើង បន្ទាប់ពីយោធាអ៊ីស្រាអែល បានរាយការណ៍នៅថ្ងៃពុធនេះថា ខ្លួនបានស្ទាក់ចាប់យន្តហោះគ្មានមនុស្សបើក (UAV) ដែលបាញ់ចេញពីភាគខាងកើត។

ក្រុមអ្នកសម្របសម្រួល បានប្រកាសថា សហរដ្ឋអាមេរិក និងក្រុមហ៊ួទី បានព្រមព្រៀងបទឈប់បាញ់មួយ ដោយនិយាយថា កិច្ចព្រមព្រៀងនេះ នឹងធានាឲ្យមាន «សេរីភាពនៃការធ្វើនាវាចរណ៍» នៅក្នុងសមុទ្រក្រហម ដែលក្រុមនេះ បានវាយប្រហារលើការដឹកជញ្ជូនជាច្រើនខែមកហើយនោះ។

កិច្ចព្រមព្រៀងនេះ កើតឡើង បន្ទាប់ពីប្រធានាធិបតី ដូណាល់ ត្រាំ បានប្រកាសថា សហរដ្ឋអាមេរិក នឹងបញ្ចប់ការវាយប្រហារប្រឆាំងនឹងក្រុមហ៊ួទី បន្ទាប់ពីពួកគេបានយល់ព្រមបញ្ឈប់ការយាយីនាវា ទោះបីជាលោកមិនបាននិយាយដោយផ្ទាល់អំពីការវាយប្រហារនាពេលថ្មីៗនេះទៅលើសម្ព័ន្ធមិត្តអ៊ីស្រាអែលក៏    ដោយ។

រដ្ឋមន្ត្រីការបរទេសអូម៉ង់ លោក Badr Albusaidi បាននិយាយកាលពីថ្ងៃអង្គារថា៖«បន្ទាប់ពីកិច្ចពិភាក្សា និងទំនាក់ទំនងថ្មីៗ ជាមួយនឹងគោលបំណងនៃការបន្ថយការកើនឡើងភាពតានតឹង កិច្ចខិតខំប្រឹងប្រែងបាននាំឲ្យមានកិច្ចព្រមព្រៀងឈប់បាញ់រវាងភាគីទាំងពីរ»។