តុលាការឧក្រិដ្ឋកម្មអន្តរជាតិ (ICC) បានច្រានចោលបណ្តឹងឧទ្ធរណ៍ពីក្រុមមេធាវីការពារក្តីរបស់អតីតប្រធានាធិបតីហ្វីលីពីន លោក Rodrigo Duterte ដែលស្នើឲ្យដកចៅក្រម ២រូប នៅក្នុងសំណុំរឿងឧក្រិដ្ឋកម្មប្រឆាំងមនុស្សជាតិរបស់លោក នៅទីក្រុងឡាអេ ប្រទេសហូឡង់។

ការសម្រេចរបស់ ICC បានលើកឡើងថា៖ «ការដកចៅក្រមពីការអនុវត្តតួនាទីមួយ អាចត្រូវបានស្វែងរកដោយចៅក្រមដែលពាក់ព័ន្ធដោយផ្ទាល់ប៉ុណ្ណោះ នៅចំពោះមុខគណៈប្រធាន ពោលគឺផ្ទុយពីការដកសិទ្ធិដែលរដ្ឋអាជ្ញា ឬបុគ្គលដែលត្រូវបានស៊ើបអង្កេត ឬកាត់ទោស អាចដាក់ពាក្យស្នើ នៅចំពោះមុខគណៈប្រធាន។ ហេតុដូច្នេះ លទ្ធភាព ដើម្បីឲ្យបុគ្គលនោះអញ្ជើញ ឬស្នើចៅក្រមស្វែងរកការដកតួនាទី នៅចំពោះមុខគណៈប្រធាន មិនត្រូវបានពិចារណាដោយច្បាប់ឡើយ»។

បើយោងតាមអង្គភាពសារព័ត៌មាន Philippine Daily Inquirer បានឲ្យដឹងថា នៅមុននេះ មេធាវីការពារក្តី បានដាក់ «សំណើផ្លូវការទៅគណៈប្រធាន ដើម្បីឲ្យមានការដកដោយផ្នែក» ចំពោះចៅក្រមលោកស្រី Reine Adelaide Sophie Alapini-Gansou និងលោកស្រី Maria del Socorro Flores Liera ពីការចូលរួមក្នុងការពិភាក្សាសម្រេចរបស់អង្គបុរេជំនុំជម្រះ I ស្ដីពីបញ្ហាយុត្តាធិការ ដោយលើកឡើងពីក្តីបារម្ភ អំពីលទ្ធភាពនៃការមានភាពលម្អៀង។

គួររំលឹក លោក Duterte ត្រូវបានចាប់ខ្លួននៅទីក្រុងម៉ានីល កាលពីថ្ងៃទី១១ ខែមីនា ក្រោមដីការបស់ ICC ហើយត្រូវបាននាំខ្លួនទៅកាន់ទីក្រុងឡាអេនៅថ្ងៃដដែលនោះ។ រូបលោកត្រូវបានឲ្យទទួលខុសត្រូវ ចំពោះការស្លាប់មនុស្សរាប់ពាន់នាក់ អំឡុងយុទ្ធនាការបង្ក្រាប ដែលលោកហៅថា សង្រ្គាមគ្រឿងញៀន នៅចន្លោះឆ្នាំ២០១៦ និងឆ្នាំ២០២២៕