ដោយបាននិយាយរួមជាមួយអធិការបតីថ្មីរបស់អាល្លឺម៉ង់ គឺលោក Friedrich Merz នៅឯវិមាន Elysee ប្រធានាធិបតីបារាំងលោក Emmanuel Macron នៅថ្ងៃពុធ (ទី៧ ខែឧសភា) នេះ បានបញ្ជាក់ថា ប្រទេសបារាំង និងអាល្លឺម៉ង់ កំពុងមានទំនាក់ទំនងយ៉ាងជិតស្និទ្ធ ដើម្បីបង្ហាញការគាំទ្រដោយមិនងាករេរបស់ប្រទេសទាំង២ ចំពោះប្រទេសអ៊ុយក្រែន ហើយនឹងបន្តធ្វើការឆ្ពោះទៅរកបទឈប់បាញ់រយៈពេល ៣០ថ្ងៃ។

លោក Macron បាននិយាយថា៖ «មានសំណួរតែមួយគត់ដែលត្រូវការចម្លើយ នោះគឺថា តើរុស្ស៊ីបានត្រៀមខ្លួនរួចជាស្រេចហើយ ឬនៅ សម្រាប់បទឈប់បាញ់ដែលមានរយៈពេលយ៉ាងហោចណាស់ ៣០ថ្ងៃ ដើម្បីអាចបង្កើតបទឈប់បាញ់ដ៏រឹងមាំ និងយូរអង្វែង? តើនៅទីបំផុត ប្រធានាធិបតីរុស្ស៊ី នឹងមានពាក្យសច្ចៈដែរ ឬទេ ជាពិសេសអ្វីដែលបានផ្តល់ឲ្យ អំឡុងពេលមានកិច្ចពិភាក្សាជាមួយរដ្ឋបាលសហរដ្ឋអាមេរិក?»។

ចំណែកលោក Merz បានលើកឡើងថា សម្រាប់រូបលោក លោកសង្ឃឹមថា បទឈប់បាញ់ជាអចិន្ត្រៃយ៍អាចត្រូវបានព្រមព្រៀងក្នុងពេលឆាប់ៗនេះ សម្រាប់អ៊ុយក្រែន ប៉ុន្តែលោកមិនបានផ្ដល់ការប្តេជ្ញាចិត្តណាមួយ ចំពោះសន្តិសុខរបស់អ៊ុយក្រែនឡើយ។

លោក Macron បានបន្ថែមថា៖ «យើងនឹងនៅទីនោះ ដើម្បីតាមមើលបទឈប់បាញ់រយៈពេល ៣០ថ្ងៃនេះ ហើយកសាងសន្តិភាពយូរអង្វែង និងរឹងមាំ។ ហើយយើង (បារាំង និងអាល្លឺម៉ង់) កំពុងមានទំនាក់ទំនងជាមួយគ្នាយ៉ាងជិតស្និទ្ធ»៕