ប្រមុខអង្គការសហប្រជាជាតិ លោក Antonio Guterres បានបង្ហាញការព្រួយបារម្ភយ៉ាងខ្លាំងចំពោះការវាយប្រហារដោយយានដ្រូនលើទីក្រុងដ៏សំខាន់មួយរបស់ស៊ូដង់ ជាទីតាំងដែលបានផ្តល់ជម្រកដល់ជនភៀសខ្លួន ដោយបានព្រមានកាលពីថ្ងៃពុធប្រឆាំងនឹងជម្លោះកាន់តែខ្លាំងក្លានៅក្នុងប្រទេសកំពុងហែកហួរដោយសង្រ្គាមគ្មានសញ្ញាបញ្ចប់មួយនេះ ។

សង្រ្គាមស៊ីវិលរបស់ប្រទេសស៊ូដង់ បានផ្ទុះឡើងជាង២ឆ្នាំ មកហើយចាប់តាំងពីឆ្នាំ២០២៣មក និងបានសម្លាប់មនុស្សរាប់ម៉ឺននាក់ ហើយបណ្ដាលឲ្យមនុស្សជាង១៣លាននាក់រត់ភៀសខ្លួននិងបង្កើតនូវអ្វីដែលគណៈកម្មការជួយសង្រ្គោះអន្តរជាតិហៅថាជាវិបត្តិមនុស្សធម៌ធំបំផុតក្នុងកំណត់ត្រា។

អ្នកនាំពាក្យលោក Guterres លោក Stephane Dujarric បាននិយាយនៅក្នុងសេចក្តីថ្លែងការណ៍មួយថា ការកើនឡើងដ៏ធំនេះអាចនាំឱ្យមានការស្លាប់ និងរបួសរបស់ជនស៊ីវិលទ្រង់ទ្រាយធំ និងការបំផ្លិចបំផ្លាញបន្ថែមទៀតនៃហេដ្ឋារចនាសម្ព័ន្ធសំខាន់ៗ។

ទីតាំងយុទ្ធសាស្ត្រក្នុងកំពង់ផែស៊ូដង់( Port Sudan) ជាមូលដ្ឋានរបស់រដ្ឋាភិបាលគាំទ្រដោយកងទ័ពនៅលើឆ្នេរសមុទ្រនៃសមុទ្រក្រហម Red Sea ត្រូវបានកំណត់គោលដៅរយៈពេល ៤ថ្ងៃក្នុងការវាយប្រហារដោយយានដ្រូន ដែលត្រូវបានស្តីបន្ទោសទៅលើកងកម្លាំងគាំទ្ររហ័សប៉ារ៉ា( RSF) ។

កំពង់ផែស៊ូដង់ គឺជាច្រកចូលដ៏សំខាន់សម្រាប់ជំនួយមនុស្សធម៌ចូលទៅក្នុងប្រទេសស៊ូដង់ ហើយលោក Dujarric បាននិយាយថា ការវាយប្រហារនេះ គំរាមកំហែងដល់ការបង្កើនតម្រូវការមនុស្សធម៌ និងធ្វើឱ្យប្រតិបត្តិការជំនួយកាន់តែស្មុគស្មាញនៅក្នុងប្រទេសនេះ ។

លោក Guterres ក៏មានការភ្ញាក់ផ្អើលផងដែរចំពោះការពង្រីកជម្លោះចូលទៅក្នុងតំបន់មួយដែលបានបម្រើជាកន្លែងជ្រកកោនសម្រាប់មនុស្សមួយចំនួនធំដែលបានភៀសខ្លួនចេញពីលំនៅឋាន ពីរដ្ឋធានី ខាទុំ (Khartoum) និងតំបន់ផ្សេងទៀត ក្នុងប្រទេសនេះ ៕