លោកប្រធានាធិបតី Trump បាននិយាយកាលពីថ្ងៃពុធសប្ដាហ៍នេះថា លោកនឹងមិនដកពន្ធលើទំនិញរបស់ចិនវិញទេ ដើម្បីនាំប្រទេសចិនទៅកាន់តុចរចា ដោយផ្ទុយទៅនឹងការរំពឹងទុកថា លោកអាចនឹងបន្ទាបពន្ធពីចំនួន១៤៥% ដើម្បីបើកផ្លូវចរចា។

ជំហររឹងរូសរបស់លោក Trump បានកើតឡើងទន្ទឹមនឹងក្រុមមន្ត្រីជាន់ខ្ពស់របស់សហរដ្ឋអាមេរិក រួមទាំងរដ្ឋមន្ត្រីក្រសួងរតនាគារលោក Scott Bessent និងតំណាងពាណិជ្ជកម្មលោក Jamieson Greer និងសមភាគីចិនគ្រោងនឹងជួបប្រជុំនៅប្រទេសស្វីសនៅចុងសប្តាហ៍នេះ ដើម្បីពិភាក្សាពាណិជ្ជកម្ម ជំរុញក្តីសង្ឃឹមសម្រាប់ការថយចុះកម្ដៅក្នុងសង្គ្រាមពាណិជ្ជកម្មរវាងសហរដ្ឋអាមេរិក និងចិន។

លោក Trump បាននិយាយកាលពីដើមសប្តាហ៍នេះថា លោកពុំមានគម្រោងនិយាយទៅកាន់លោក Xi Jinping មេដឹកនាំប្រទេសចិននោះទេ ទោះបីលោកបានលើកឡើងនាពេលថ្មីៗនេះថា លោកនឹងមានឆន្ទៈក្នុងការបន្ទន់ជំហរបន្ធូរបន្ថយពន្ធលើការនាំចូលពីប្រទេសចិនក៏ដោយ។

លោក Trump បាននិយាយនៅក្នុងកម្មវិធី Meet the Press របស់ទូរទស្សន៍ NBC កាលពីចុងសប្តាហ៍មុនថា នៅពេលណាមួយ លោកនឹងបន្ទាបពន្ធទាំងនោះ ព្រោះបើមិនដូច្នេះទេ អ្នកមិនអាចធ្វើជំនួញជាមួយពួកគេបានទេ ហើយពួកគេចង់ធ្វើអាជីវកម្មខ្លាំងណាស់។ប៉ុន្តែថ្មីៗនេះ លោកបានអះអាងថា    អាមេរិកមិនខាតបង់អ្វីទេ ទោះមានការធ្លាក់ចុះពាណិជ្ជកម្មជាមួយទីក្រុងប៉េកាំងក៏ដោយ។

ប្រទេសចិនត្រូវបានរាយការណ៍ថាបានចងក្រងបញ្ជីទំនិញរបស់សហរដ្ឋអាមេរិកដែលត្រូវបានលើកលែងពីពន្ធគយ១២៥% ក្នុងគោលបំណងបន្ធូរបន្ថយភាពតានតឹងពាណិជ្ជកម្មដោយមិនចាំបាច់ធ្វើសម្បទានជាសាធារណៈ។

ទន្ទឹមនឹងនេះដែរលោក Trump បានការពារជំហរដំឡើងពន្ធ១៤៥% លើការនាំចូលរបស់ចិនដោយអះអាងថាប្រទេសចិន សមនឹងទទួលបាន។ ប្រទេសចិនលើកឡើងដដែលថា ខ្លួននឹងមិនចុះញ៉ាមអាមេរិកឡើយ និងកំដរដល់ទីបញ្ចប់៕