នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយកាលពីថ្ងៃពុធ (០៧ ឧសភា) ថា ជោគវាសនាចំណាប់ថ្នូរអ៊ីស្រាអែល ៣នាក់នៅតំបន់ហ្កាហ្សា ដែលពីមុនគិតថាកំពុងនៅរស់ ពេលនេះកំពុងស្ថិតក្នុងភាពមិនច្បាស់លាស់ ហើយអាចនឹងស្លាប់បាត់ហើយ ដោយបន្សល់ទុកតែមនុស្ស ២១នាក់ប៉ុណ្ណោះ ដែលគេពិតជាជឿថានៅមានជីវិត។

ថ្លែងនៅក្នុងព្រឹត្តិការណ៍មួយនៅឯសេតវិមានកាលពីថ្ងៃអង្គារ លោកប្រធានាធិបតីអាមេរិក Donald Trump បាននិយាយថា ចំណាប់ថ្នូរ ២៤នាក់ ដែលកាលពីមួយសប្តាហ៍មុននៅរស់រានមានជីវិត ឥឡូវនេះមានតែ ២១នាក់ប៉ុណ្ណោះដែលនៅរស់ ដោយលោកមិនបានដកស្រង់ប្រភព ឬផ្តល់ព័ត៌មានលម្អិតបន្ថែមទេ។

ក្រោយមក លោក Gal Hirsch អ្នកសម្របសម្រួលរបស់អ៊ីស្រាអែលសម្រាប់បញ្ហាចំណាប់ថ្នូរ បាននិយាយលើបណ្ដាញសង្គម X ថា ក្រុមសកម្មប្រយុទ្ធប៉ាឡេស្ទីនហាម៉ាស កំពុងចាប់ចំណាប់ថ្នូរ ៥៩នាក់ ដែលក្នុងនោះ ២៤នាក់នៅរស់ និង ៣៥នាក់បានស្លាប់ - ដោយតួលេខនេះមិនផ្លាស់ប្តូរទេ មុនពេលការលើកឡើងរបស់លោក Trump។ យ៉ាងណាមិញ ការអត្ថាធិប្បាយរបស់លោក Netanyahu ទំនងជាបញ្ជាក់ពីតួលេខអ្នកនៅរស់ ២១នាក់ ដែលបានលើកឡើងដោយលោក Trump។

ជោគវាសនារបស់ចំណាប់ថ្នូរ គឺជាបញ្ហាដ៏ចម្រូងចម្រាសមួយសម្រាប់ប្រជាជនអ៊ីស្រាអែលភាគច្រើន ហើយក៏ជាបញ្ហាមួយដែលបណ្តាលឱ្យមានការរំជើបរំជួល និងការខ្វែងគំនិតគ្នាកាន់តែខ្លាំងឡើងនៅក្នុងសង្គមអ៊ីស្រាអែល ខណៈសង្រ្គាមដែនដីហ្កាហ្សា បន្តអូសបន្លាយ៕