ភ្នំពេញ៖ សៀវភៅមួយក្បាល ដែលជាស្នាដៃរបស់កូនខ្មែរឈ្មោះ “ផែនទីផ្នត់គំនិត (Mind Map)” ត្រូវបានដាក់បញ្ចូលទៅក្នុងអេប bookeyond ដែលជាអេបសង្ខេបសៀវភៅជាភាសារខ្មែរ ដំបូងនៅកម្ពុជា ដើម្បីចូលរួមក្នុងការធ្វើឲ្យវិស័យអប់រំនៅកម្ពុជា កាន់តែមានសក្ដានុពល។

ក្នុងពិធីចុះអនុស្សារណៈយោគយល់គ្នា ជាមួយក្រុមហ៊ុនប៊ុកឃីអន (bookeyond) ក្នុងការដាក់បញ្ចូលសៀវភៅ “ផែនទីផ្នត់គំនិត” ទៅក្នុងអេប bookeyond នៅថ្ងៃទី១២ ខែធ្នូ ឆ្នាំ២០២១ ឧកញ៉ា ជា តុងហ៊ួរ សហគ្រិនវ័យក្មេងមួយរូបនៅកម្ពុជា បានលើកឡើងថា សៀវភាពនេះ ជាសៀវភៅដ៏ល្អ ដែលលើកឡើងពីបទពិសោធរកស៊ីរបស់ឧកញ៉ាផ្ទាល់ រាប់ចាប់តាំងពីការធ្លាក់ដល់បាតរហូតដល់ ទទួលបានជោគជ័យ និងមានសមិទ្ធិផលជាស្នាដៃរបស់ខ្លួន។

លោកឧកញ៉ា បន្តថា សៀវភៅមួយក្បាលនេះ នឹងផ្តល់អត្ថប្រយោជន៍ដ៏ច្រើន ចំពោះអ្នកអានដូចជា ការលើកកម្លាំងចិត្តការតស៊ូអត់ធ្មត់ក្នុងជីវិត ការវិភាគលើចំណុចខ្សោយ និងចំណុចខ្លាំងខ្លួនឯង ការសេពគប់មនុស្ស ចំណេះដឹងអចលនទ្រព្យ វិធីសាស្រ្តប្រែក្លាយខ្លួនពីមនុស្សបរាជ័យទៅជាមនុស្សជោគជ័យ។ល។ និង។ល។

ឧកញ៉ា ជា តុងហ៊ួរ បន្ថែមថា អ្វីដែលពិសេសបំផុតនោះ គឺអ្នកអាននឹងចេះបង្កើតផែនទីផ្នត់គំនិត ដើម្បីចាត់ចែងរៀបចំជីវិតខ្លួនឯងឱ្យក្លាយជាមនុស្សជោគជ័យប្រកបដោយគុណតម្លៃម្នាក់ ដោយចាប់ពីពេលនេះតទៅសៀវភៅ “ផែនទីផ្នត់គំនិត (Mind Map)” មានដាក់លក់នៅក្នុងអេប bookeyond ហើយដែលមានទាំងជាអត្ថបទ និងសំឡេង។

លោកឧកញ៉ា សង្ឃឹមយ៉ាងមុតមាំថា កិច្ចសហការនេះ នឹងផ្តល់ផ្លែផ្កាដល់ភាគីទាំងពីរ និងសាធារណជនផងដែរ ខណៈសៀវភៅនេះ គឺជាស្នាដៃប្រសូត្រចេញពីបទពិសោធរបស់លោកជាច្រើនឆ្នាំ ដែលបានប្រឡូកនៅក្នុងជីវិតជាអ្នករកស៊ី ហើយបានឆ្លងកាត់មេរៀនជូរចត់យ៉ាងសន្ធឹកសន្ធាប់។

លោកឧកញ៉ា បញ្ជាក់ថា អ្នកអានសៀវភៅនេះ ដោយយកចិត្តទុកដាក់ ព្រមទាំងអនុវត្តតាមគោលការណ៍ និងទ្រឹស្តីដែលមាននៅក្នុងសៀវភៅនេះ ប្រាកដជាក្លាយខ្លួនទៅជាមនុស្សថ្មីម្នាក់ប្រកបដោយគុណតម្លៃ ការរីកចម្រើន និងជោគជ័យ។

លោក រឺន សីហា ជាអ្នកតំណាងរបស់ក្រុមហ៊ុន bookeyond បានលើកឡើងថា កិច្ចសហការនេះ ជាដំណើរឆ្ពោះទៅមុខមួយជំហានទៀតសម្រាប់ក្រុមហ៊ុន bookeyond ក្នុងការរួមចំណែកពង្រីកសក្កានុពលវិស័យអប់រំ និងអាជីវកម្មនៅកម្ពុជា ។

លោកបានបន្តទៀតថា ក្រុមហ៊ុនប៊ុកឃីអន បានចាប់កំណើតឡើងនៅឆ្នាំ២០១៩ ហើយមកទល់នឹងពេលនេះ មានសៀវភៅសង្ខេបនៅក្នុងអេបជាង ៣០០ក្បាលហើយសម្រាប់អ្នកប្រើប្រាស់របស់ខ្លួន៕