យោងតាមទូរទស្សន៍ Geo TV និងសាក្សីរបស់សារព័ត៌មានរ៉យទ័រ បានឱ្យដឹងថា សំឡេងផ្ទុះដ៏ធំត្រូវបានគេលាន់ឮនៅក្នុងទីក្រុង Lahore ភាគខាងកើតប៉ាគីស្ថាន នៅព្រឹកថ្ងៃព្រហស្បតិ៍ (០៨ ឧសភា) នេះ រយៈពេលមួយថ្ងៃបន្ទាប់ពីឥណ្ឌា វាយប្រហារនៅទីតាំងជាច្រើនក្នុងប្រទេស និងការភ័យខ្លាចនៃការកើនឡើងក្នុងជម្លោះរវាងប្រទេសជិតខាងមានអាវុធនុយក្លេអ៊ែរទាំងពីរ។

មិនទាន់មានការបញ្ជាក់ពីមូលហេតុនៃការផ្ទុះនេះនៅឡើយទេ។ គួរឱ្យដឹងថា ឥណ្ឌាបានវាយលុក "ហេដ្ឋារចនាសម្ព័ន្ធភេរវករ" នៅប៉ាគីស្ថាន នៅព្រឹកព្រលឹមថ្ងៃពុធ ពីរសប្តាហ៍បន្ទាប់ពីខ្លួនបានចោទប្រទេសអ៊ិស្លាមមួយនេះថាមានជាប់ពាក់ព័ន្ធក្នុងការវាយប្រហារនៅតំបន់កាស្មៀរឥណ្ឌា ដែលមនុស្ស ២៦នាក់ ភាគច្រើនជាភ្ញៀវទេសចរហិណ្ឌូ ត្រូវបានសម្លាប់។

ទីក្រុងអ៊ីស្លាម៉ាបាដ បានបដិសេធការចោទប្រកាន់នេះ ហើយបានប្តេជ្ញាសងសឹកចំពោះការវាយប្រហារដោយមីស៊ីលរបស់ទីក្រុងដេលី ដោយនិយាយថា ខ្លួនបានបាញ់ទម្លាក់យន្តហោះឥណ្ឌាចំនួន ៥គ្រឿង។ ស្ថានទូតឥណ្ឌាប្រចាំទីក្រុងប៉េកាំង បានហៅរបាយការណ៍នៃយន្តហោះចម្បាំង ដែលត្រូវបានគេបាញ់ទម្លាក់នោះថាជា "ព័ត៌មានមិនពិត"។

ប៉ាគីស្ថាននិយាយថា យ៉ាងហោចណាស់ជនស៊ីវិល ៣១នាក់ត្រូវបានសម្លាប់ និងប្រហែល ៥០នាក់រងរបួសនៅក្នុងការវាយប្រហារ និងការបាញ់ផ្លោងឆ្លងព្រំដែនដែលបានកើតឡើង ខណៈខាងឥណ្ឌានិយាយថា ជនស៊ីវិល ១៣នាក់បានស្លាប់ និង ៤៣នាក់រងរបួស។ ក្រុមមន្ត្រីឥណ្ឌាលើកឡើងថា ការផ្ទុះអាវុធឆ្លងកាត់ព្រំដែនបានស្ងប់ស្ងាត់បន្តិចកាលពីយប់ថ្ងៃពុធ៕