កងទ័ពឥណ្ឌា បាននិយាយនៅថ្ងៃព្រហស្បតិ៍ (០៨ ឧសភា) នេះថា ទាហានរបស់ទីក្រុងដេលី និងប៉ាគីស្ថាន បានបាញ់តដៃគ្នាក្នុងទ្រង់ទ្រាយតូច និងការបាញ់កាំភ្លើងធំពេញមួយយប់ថ្ងៃពុធ តាមបណ្តោយព្រំដែនជាក់ស្ដែងក្នុងតំបន់ជម្លោះកាស្មៀរ។

គូប្រជែងមានអាវុធនុយក្លេអ៊ែរទាំងពីរ បានជួបប្រទះនឹងអំពើហិង្សាដ៏អាក្រក់បំផុតរបស់ពួកគេក្នុងពេល ២ទសវត្សរ៍ចុងក្រោយកាលពីថ្ងៃពុធសប្ដាហ៍នេះ បន្ទាប់ពីឥណ្ឌា បានបាញ់មីស៊ីលទៅលើប្រទេសជិតខាងរបស់ខ្លួន ជាមួយនឹងការបាញ់មីស៊ីលម្តងហើយម្តងទៀតជាច្រើនថ្ងៃនៅតាមព្រំដែនរបស់ពួកគេ ដែលកើនឡើងដល់ការបាញ់ផ្លោងកាំភ្លើងធំ។

កងទ័ពឥណ្ឌា បាននិយាយនៅក្នុងសេចក្តីថ្លែងការណ៍មួយថា "ពេលយប់ថ្ងៃពុធ ប៉ុស្តិ៍កងទ័ពប៉ាគីស្ថាន បានបាញ់ប្រហារឥតញញើតដៃដោយប្រើអាវុធធុនតូច និងកាំភ្លើងធំ ឆ្លងកាត់បន្ទាត់ត្រួតពិនិត្យនៅតំបន់ព្រំដែនកាស្មៀរ" ដោយបន្ថែមថា កងទ័ពឥណ្ឌាបាន "ឆ្លើយតបតាមលក្ខណៈសមាមាត្រគ្នា"។

មិនមានការបញ្ជាក់ភ្លាមៗពីប៉ាគីស្ថាន អំពីការបាញ់តបតគ្នា ដែលត្រូវបានរាយការណ៍ចុងក្រោយនៅតាមបណ្តោយព្រំដែននោះទេ។ នាយករដ្ឋមន្ត្រីប៉ាគីស្ថាន លោក Shehbaz Sharif បាននិយាយនៅក្នុងសុន្ទរកថាទៅកាន់ប្រជាជាតិកាលពីល្ងាចថ្ងៃពុធថា ទីក្រុងអ៊ីស្លាម៉ាបាដនឹង "សងសឹក" ឱ្យមនុស្សរាប់សិបនាក់ដែលបានស្លាប់ក្នុងការវាយប្រហាររបស់ឥណ្ឌា៕