ប្រធានាធិបតីអាមេរិក លោក Donald Trump បានសម្តែងការមិនសប្បាយចិត្តកាន់តែខ្លាំងឡើងចំពោះល្បឿននៃការចរចារសន្តិភាព ដែលសម្របសម្រួលដោយសហរដ្ឋអាមេរិក រវាងរុស្ស៊ី និងអ៊ុយក្រែន ទាក់ទងនឹងជម្លោះបច្ចុប្បន្ន ហើយបានព្រមានភាគីទាំងសងខាងថា "ការសម្រេចចិត្តចាំបាច់ត្រូវសម្រេចក្នុងពេលឆាប់ៗនេះ"។

យោងតាមអនុប្រធានាធិបតីអាមេរិក លោក J.D. Vance បច្ចុប្បន្ននេះ ទីក្រុងវ៉ាស៊ីនតោន បានចាត់ទុកការទាមទាររបស់រុស្ស៊ី សម្រាប់ការបញ្ចប់ជម្លោះ ជារឿងមិនអាចទទួលយកបាន។ ថ្លែងនៅឯកិច្ចប្រជុំថ្នាក់ដឹកនាំ Munich នៅក្នុងទីក្រុងវ៉ាស៊ីនតោន កាលពីថ្ងៃពុធ (០៧ ឧសភា) លោក Vance បាននិយាយថា "ភាគីរុស្ស៊ី កំពុងលើកសំណើជាច្រើននៃតម្រូវការជាក់លាក់ និងសម្បទានដើម្បីបញ្ចប់ជម្លោះ ហើយអាមេរិកគិតថា ពួកគេស្នើសុំច្រើនពេកហើយ"។

នៅពេលត្រូវស្នើឱ្យអត្ថាធិប្បាយលើសេចក្តីថ្លែងការណ៍របស់លោក Vance លោក Trump បានបង្ហើបនៅក្នុងសន្និសីទសារព័ត៌មានមួយថា "នេះអាចទៅរួចដែលថាការលើកឡើងរបស់អនុប្រធានាធិបតីលោក ជារឿងត្រឹមត្រូវ"។

ឥស្សរជនជាន់ខ្ពស់ក្នុងរដ្ឋបាលអាមេរិកបច្ចុប្បន្ន រួមទាំងប្រធានាធិបតីអាមេរិកផ្ទាល់ បានគំរាមថា ទីក្រុងវ៉ាស៊ីនតោន ប្រហែលជាត្រូវដើរចេញពីការព្យាយាមសម្របសម្រួលកិច្ចចរចា ជុំវិញជម្លោះអ៊ុយក្រែន ប្រសិនបើវឌ្ឍនភាពគ្រប់គ្រាន់មិនកើតមានឡើង។ តាមសេចក្តីរាយការណ៍បានឱ្យដឹងថា ទីក្រុងវ៉ាស៊ីនតោន បានរៀបចំនូវការដាក់ទណ្ឌកម្មសេដ្ឋកិច្ចថ្មីៗ ដែលផ្តោតលើវិស័យថាមពល និងធនាគាររបស់រុស្ស៊ី ដែលអាចយកធ្វើជាថ្នូរនៅក្នុងកិច្ចពិភាក្សានេះ៕