មន្ត្រីម្នាក់បានប្រាប់សារព័ត៌មាន AFP កាលពីថ្ងៃពុធថា ក្រុមសកម្មប្រយុទ្ធហ៊ួទីនៅប្រទេសយេម៉ែន នឹងបន្តកំណត់គោលដៅលើនាវាអ៊ីស្រាអែល នៅក្នុងសមុទ្រក្រហម បើទោះបីជាមានបទឈប់បាញ់ ដែលបានបញ្ចប់ការវាយប្រហារដ៏ខ្លាំងក្លាជាច្រើនសប្តាហ៍របស់សហរដ្ឋអាមេរិក ទៅលើក្រុមដែលគាំទ្រដោយអ៊ីរ៉ង់ក៏ដោយ។

មួយថ្ងៃបន្ទាប់ពីក្រុមហ៊ួទី បានយល់ព្រមបញ្ឈប់វាយប្រហារប្រហារលើនាវា ដែលកំពុងធ្វើដំណើរលើផ្លូវពាណិជ្ជកម្មដ៏សំខាន់ នៅឆ្នេរសមុទ្ររបស់ពួកគេ មន្ត្រីជាន់ខ្ពស់បានប្រាប់កាសែត AFP ថា អ៊ីស្រាអែលត្រូវបានដកចេញពីកិច្ចព្រមព្រៀងនេះ។

លោក Abdulmalik Alejri សមាជិកនៃការិយាល័យនយោបាយរបស់ក្រុមហ៊ួទី បានប្រាប់សារព័ត៌មាន AFPថា៖«ផ្លូវទឹកមានសុវត្ថិភាពសម្រាប់នាវាអន្តរជាតិទាំងអស់ លើកលែងតែនាវារបស់អ៊ីស្រាអែល»។

លោកបាននិយាយថា៖«អ៊ីស្រាអែលមិនមែនជាផ្នែកនៃកិច្ចព្រមព្រៀងនេះទេ វារួមបញ្ចូលតែនាវាអាមេរិក និងនាវាផ្សេងទៀត»។

ក្រុមហ៊ួទីដែលបានគ្រប់គ្រងតំបន់ដ៏ធំនៃប្រទេសយេម៉ែនអស់រយៈពេលជាងមួយទសវត្សរ៍ បានចាប់ផ្តើមបាញ់ប្រហារលើការដឹកជញ្ជូន ដែលពាក់ព័ន្ធជាមួយអ៊ីស្រាអែល នៅក្នុងសមុទ្រក្រហម និងឈូងសមុទ្រ Aden ក្នុងខែវិច្ឆិកា ឆ្នាំ ២០២៣ រយៈពេលប៉ុន្មនាសប្តាហ៍បន្ទាប់ពីការចាប់ផ្តើមនៃសង្រ្គាមអ៊ីស្រាអែល និងក្រុមហាម៉ាស។

ពួកគេបានពង្រីកយុទ្ធនាការ ដើម្បីកំណត់គោលដៅនាវាដែលមានទំនាក់ទំនងជាមួយសហរដ្ឋអាមេរិក និងចក្រភពអង់គ្លេស បន្ទាប់ពីការវាយប្រហារដោយយោធារបស់ប្រទេសទាំងពីរ បានចាប់ផ្តើម នៅក្នុងខែមករា ឆ្នាំ ២០២៤។