អភិបាលក្រុងលោក Sergei Sobyanin បាននិយាយកាលពីថ្ងៃពុធថា កងកម្លាំងការពារដែនអាកាសរុស្ស៊ី បានបាញ់ទម្លាក់យានដ្រូនរបស់អ៊ុយក្រែនចំនួន ១២គ្រឿង ដែលកំពុងហោះឆ្ពោះទៅកាន់ទីក្រុងមូស្គូ។

នៅក្នុងការបង្ហោះជាបន្តបន្ទាប់ក្នុងរយៈពេល ៤ម៉ោង នៅលើកម្មវិធីផ្ញើសារ Telegram លោក Sobyanin បានបញ្ជាក់ថា យានដ្រូនចំនួន ១២គ្រឿង ដែលកំពុងហោះទៅកាន់រដ្ឋធានីនេះ ត្រូវបានវាយប្រហារ ឬកម្ទេចចោល។

កាលពីព្រឹកថ្ងៃពុធ កម្មវិធីផ្ញើសារ Telegram channel Shot ដែលមានប្រភពនៅក្នុងទីភ្នាក់ងារអនុវត្តច្បាប់របស់រុស្ស៊ី បានរាយការណ៍ថា យន្តហោះគ្មានមនុស្សបើកមួយគ្រឿង ត្រូវបានទម្លាក់នៅក្នុងតំបន់មូស្គូ ខណៈមួយចំនួនផ្សេងទៀត ត្រូវបានបំផ្លាញ នៅតំបន់ Kaluga ដែលនៅជិតខាង។

ក្រុមឃ្លាំមើលអាកាសចរណ៍របស់រុស្ស៊ី បាននិយាយថា អាកាសយានដ្ឋាន Zhukovsky ក្នុងតំបន់មូស្គូ នៅខាងក្រៅរដ្ឋធានី និងអាកាសយានដ្ឋានដ៏ធំ នៅក្នុងទីក្រុង Kaluga ភាគខាងត្បូងនៃទីក្រុងមូស្គូ ត្រូវបានបិទជាបណ្តោះអាសន្ន។

អាកាសយានដ្ឋាន Domodedovo របស់ទីក្រុងមូស្គូ ដែលត្រូវបានបិទពេញមួយថ្ងៃ បានដំណើរការឡើងវិញនៅពេលល្ងាច។

នាព្រឹកថ្ងៃពុធ ក្រសួងការពារជាតិរុស្ស៊ី បាននិយាយថា កងកម្លាំងរបស់ខ្លួន បានបាញ់ទម្លាក់យានដ្រូនចំនួន ៥២៤គ្រឿង ក្នុងរយៈពេល ២៤ម៉ោង កន្លងទៅនេះ។ ក្រសួងមិនបានបញ្ជាក់ពីទីតាំងដែលយានដ្រូនទាំងនោះ ត្រូវបានបំផ្លាញចោលនោះទេ។