អាហ្វ្រិក​ខាងត្បូង៖ ការិយាល័យ​ប្រធានាធិបតី​បាន​និយាយ​ថា ប្រធានាធិបតី​អាហ្វ្រិក​ខាងត្បូង​លោក Cyril Ramaphosa កំពុង​ទទួល​ការព្យាបាល​សម្រាប់​រោគសញ្ញា​កម្រិត​ស្រាល​នៃ​វីរុស COVID-19 បន្ទាប់ពី​លោក​បាន​ធ្វើ​តេស្ត​វិជ្ជមាន​វីរុសកាលពី​ថ្ងៃអាទិត្យ​។ លោក Ramaphosa ចាប់ផ្ដើម​មិន​ស្រួលខ្លួន ហើយ​ការ​ធ្វើ​តេស្ត​បាន​បញ្ជាក់​ថា​បាន​ឆ្លង​វីរុស COVID-19។

សេចក្ដីថ្លែងការណ៍​បាននិយាយ​ថា លោក​កំពុង​នៅ​ដាក់​ឲ្យ​ធ្វើ​ច​ត្តា​ឡី​ស័ក​នៅ​ទីក្រុង​ Cape Town ហើយកំពុង​ត្រូវ​បាន​ពិនិត្យដោយអង្គភាពសេវា​សុខភាព​យោធា​អាហ្វ្រិក​ខាងត្បូង​។ លោក​បាន​ផ្ទេរ​ការទទួលខុសត្រូវ​ទាំងអស់​ទៅ​ឲ្យ​អនុ​ប្រធានាធិបតីលោក David Mabuza។​ ​លោក Ramaphosa អាយុ ៦៩ឆ្នាំបាន​ចាក់​វ៉ាក់សាំង​ពេញលេញ​រួចហើយ​។ សេចក្ដីថ្លែងការណ៍​មិន​បាន​និយាយ​ថា ​តើ​លោក​បាន​ឆ្លង​វីរុស​ប​ម្លែ​ង​ខ្លួន​ថ្មី Omicron នៃវីរុស​កូ​រ៉​ណា ឬ​វីរុស​ប្រភេទ​ណា​នៅ​ឡើយ​នោះ​ទេ។​

​កាលពី​សប្ដាហ៍​មុនលោក Ramaphosa បាន​ធ្វើ​ដំណើរ​ទៅកាន់​ប្រទេស​ចំនួន​៤ ​នៅ​អាហ្វ្រិក​ខាងលិច​។ លោក​ និង​សមាជិក​ទាំង​អស់​នៃ​គណៈប្រតិភូ​របស់​លោកត្រូវ​បានធ្វើ​តេស្ត​រ​កវី​រុស COVID-19 នៅក្នុង​ប្រទេស​នីមួយៗ​ក្នុងអំឡុងពេល​ធ្វើដំណើ​រ​។ ​សមាជិក​មួយចំនួន​នៅក្នុង​គណៈប្រតិភូ​បានធ្វើ​តេស្ត​វិជ្ជមាន​នៅក្នុង​ប្រទេស​នី​ហ្សេ​រី​យ៉ា ហើយ​បានត្រឡប់​ទៅ​អាហ្វ្រិក​ខាងត្បូង​ដោយផ្ទាល់​។ លោក Ramaphosa បាន​វិលត្រឡប់​ពី​ប្រទេស​សេ​ណេហ្គា​ល់​វិញនៅ​ថ្ងៃទី៨ ខែធ្នូ​៕

អត្ថបទ៖ ប៊ុនថន