អធិការបតីថ្មីនៃប្រទេសអាល្លឺម៉ង់ លោក Friedrich Merz បាននិយាយថា បញ្ហានៃការបញ្ជូនទាហានអាល្លឺម៉ង់ ទៅកាន់ប្រទេសអ៊ុយក្រែន ដើម្បីធានាបានបទឈប់បាញ់យូរអង្វែងដ៏មានសក្តានុពលមួយ ដែលមិនមាននៅក្នុងរបៀបវារៈ នាពេលនេះទេ។

លោកបាននិយាយនៅក្នុងបទសម្ភាសន៍ជាមួយទូរទស្សន៍ Welt ថា៖«បញ្ហានេះ គឺមិនស្ថិតនៅក្នុងរបៀប   វារៈទេ ឥឡូវនេះ»។ «យើងនៅឆ្ងាយពីបទឈប់បាញ់ ហើយនៅកាន់តែឆ្ងាយពីកិច្ចព្រមព្រៀងសន្តិភាព។ អ្វីដែលជាប្រធានបទនៅថ្ងៃនេះ គឺការបង្កើតបទឈប់បាញ់ នៅចុងសប្តាហ៍នេះ ដូចដែលបានប្រកាសដោយថ្នាក់ដឹកនាំរុស្ស៊ី។ ខ្ញុំសង្ឃឹមយ៉ាងមុតមាំថា វានឹងត្រូវបានបន្តទៅទៀត បន្ទាប់ពីចុងសប្តាហ៍នេះ។

យោងតាមលោក Merz បានឲ្យដឹងថា ទីក្រុងប៊ែរឡាំង គាំទ្រកិច្ចខិតខំប្រឹងប្រែងរបស់សហរដ្ឋអាមេរិកលើផ្លូវនេះ។ លោកបានបញ្ជាក់ថា៖«យើងនឹងមើលឃើញថា តើវាមានការវិវឌ្ឍយ៉ាងណា ក្នុងដំណើរការនេះ។

លោកបានបញ្ជាក់ជាថ្មីម្តងទៀតនូវផែនការគាំទ្រនិងផ្តល់អាវុធដល់កម្លាំងប្រដាប់អាវុធអ៊ុយក្រែន រួមទាំងការរួមគ្នាជាមួយសហរដ្ឋអាមេរិក។ លោកបានសង្កត់ធ្ងន់ថា៖«មានលទ្ធភាពជាច្រើនក្នុងការធានានូវកិច្ចព្រមព្រៀងឈប់បាញ់បែបនេះ និងកិច្ចព្រមព្រៀងសន្តិភាពជាបន្តបន្ទាប់»។

ប្រធានាធិបតីរុស្ស៊ី លោក វ្ល៉ាឌីមៀ ពូទីន បានសម្រេចចិត្តប្រកាសបទឈប់បាញ់ពីម៉ោង ១២:០០នាទីព្រឹក ម៉ោងនៅទីក្រុងមូស្គូ នៅថ្ងៃទី ០៨ ខែឧសភា (ម៉ោង៩:០០យប់ ម៉ោងសកល ថ្ងៃទី ០៧ ខែឧសភា) ដល់ម៉ោង ១២:០០ ព្រឹក ម៉ោងនៅទីក្រុងមូស្គូ នៅថ្ងៃទី ១១ ខែឧសភា (ម៉ោង៩:០០ យប់ ថ្ងៃទី១០ ឧសភា)។ យោងតាមវិមានក្រឹមឡាំង «ប្រតិបត្តិការយោធាទាំងអស់ នឹងត្រូវបានផ្អាកក្នុងអំឡុងពេលនេះ»។ ទោះបីជាយ៉ាងណាក៏ដោយ លោកវ្ល៉ូឌីមី ហ្សេឡិនស្គី បានច្រានចោលសំណើនេះ ដោយទាមទារឲ្យមានការផ្អាកយូរជាងនេះ ក្នុងការប្រយុទ្ធតាមលក្ខខណ្ឌផ្ទាល់ខ្លួន និងធ្វើការគំរាមកំហែងប្រឆាំងនឹងការប្រារព្ធទិវាជ័យជម្នះ នៅទីក្រុងមូស្គូ។