កីឡាមហាជន៖ ឯកឧត្ដម គង់ សោភ័ណ្ឌ អភិបាលនៃគណៈអភិបាលខេត្តកណ្ដាល បានអំពាវនាវឲ្យប្រជាពលរដ្ឋកម្ពុជាគ្រប់រូបចូលរួមហាត់ប្រាណ និងលេងកីឡាដើម្បីពង្រឹងកាយសម្បទារបស់ខ្លួន និងអាចឈ្នះជំងឺឆ្លងទាំងឡាយផង ព្រមទាំងចូលរួមយុទ្ធនាការឆ្ពោះទៅធ្វើម្ចាស់ផ្ទះការប្រកួតកីឡាស៊ីហ្គេម-អាស៊ានប៉ារ៉ាហ្គេមឆ្នាំ២០២៣ នៅកម្ពុជាផងដែរ។
ការអំពាវនាវថ្នាក់ដឹកនាំខេត្តកណ្ដាលនេះ ធ្វើឡើងក្នុងពិធីបិទការប្រកួតកីឡាមហាជនជ្រើសរើសជើងឯកថ្នាក់ខេត្តប្រចាំឆ្នាំ២០២១ នៅកីឡដ្ឋានខេត្តកណ្តាលកាលពីចុងសប្ដាហ៍កន្លងទៅ។ ឯកឧត្តមបន្តថា ការលេងកីឡាមិនត្រឹមតែទទួលបាននូវសុខភាពល្អនោះទេ តែក៏ជាការរួមចំណែកក្នុងយុទ្ធនាការជាតិ «ប្រជាជនម្នាក់ លេងកីឡាមួយមុខ» ស្របតាមអនុសាសន៍ដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកកម្ពុជា ដើម្បីបំផុសសកម្មភាពកីឡាត្រៀមទទួលធ្វើម្ចាស់ផ្ទះព្រឹត្តិការណ៍កីឡាប្រចាំតំបន់ជាប្រវត្តិសាស្ដ្រនាឆ្នាំ២០២៣ ផងដែរ។ យ៉ាងណាក្ដីឯកឧត្តមក៏បានក្រើនរម្លឹកដែរថា ការចាប់ផ្ដើមនូវសកម្មភាពកីឡាឡើងវិញនេះ ផ្ដើមមកពីការយកចិត្តទុកដាក់របស់រាជរដ្ឋាភិបាល ការចាក់វ៉ាក់សាំង និងការអនុវត្តបានយ៉ាងល្អនូវវិធានការក្រសួងសុខាភិបាល។ ការណ៍នេះ ឯកឧត្តមបានអំពាវនាវឲ្យប្រជាពលរដ្ឋ ប្រតិភូ គ្រូបង្វឹក និងកីឡាករ-កីឡាការិនីបន្ដការការពារ ពិសេស ៣ការពារ និង ៣កុំដើម្បីសុវត្ថិភាព និងឈានទៅការប្រកួតថ្មីៗជាបន្ដបន្ទាប់ទៀត។
លោក ចេង សំអុល ប្រធានធានមន្ទីរអប់រំ យុវជន និងកីឡាខេត្តកណ្តាលបានឲ្យដឹងថា ការប្រកួតកីឡាមហាជនជ្រើសរើសជើងឯកថ្នាក់ខេត្តប្រចាំឆ្នាំ២០២១ បានដំណើរការប្រកួតរយៈពេល ១សប្ដាហ៍ចាប់ពីថ្ងៃទី៤ ដល់ថ្ងៃទី១០ ខែធ្នូ ឆ្នាំ២០២១ នៅទីលានសំខាន់ៗមួយចំនួនក្នុងខេត្ត ដោយប្រកួតលើ ៥ប្រភេទកីឡារួមមានកីឡាបាល់ទាត់ បាល់ទះ បាល់បោះ អត្តពលកម្ម និងកីឡាទាញព្រ័ត្រដែលមានកីឡាករ-កីឡាការិនីចូលរួមសរុប ៧៥០នាក់៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
